ما قلت لك بيني وبينك مسافات = ظلام ليل وسهلة جرهديه
في داخلي ذيب وفي داخلك شات = وخاف اجفلها ويشره عليه
تقدير بعض الناس من قدر الأموات = أرواح موتى تنقذ أرواح حيه
بجلباب أبوك مسويلي بطولات = تطرد سراب الال فالمهمهية
الله أكبر يازعيم الفتوحات = والله ولا عنتر بظهر العبيه
لي دين واحد والمقامك ديانات = ولولا صلواتك تضيع الرعيه
ولولاك ما صارت أمريكا ولايات = ولولاك ما ندري وش الجاذبية
أستاذ مبدع في جميع المجالات = يا عبقري ياقمة العبقرية
منك يتعلم تايه الفكر حاجات = الفشخرة والكذب والعنجهية
وتحجيم خلق الله وتعظيم للذات = والهجوله والطهبله والأسيه
مريتك البارح أبي منك فزعات = تعينن على نفسك عساك الأذيه
ولقيتك أكبر من جبال السراوات = وأصغر من النملة بجنب المطيه
قصيدة بعنوان " المسافات " للشاعر : سالم الرمالي