[معلومات العضو عامر البدراني]

الله يجزاك خير اخوي ماعليكم زود
على هالنقل الرائع
ورحم الله الشاعر المعروف مساعد بن جار الله الغزي البدراني
شاعر فحل ورجل كريم وراعي نخوة وفزعة للكبير والصغير


تفضلوا القصيدة كاملة :


يا حمد خل الباب مفتوح خله
حتى المسير لا عنا ما يهابه

أخاف يترك طقة الباب ذله
ويخسر مجيه وانت تخسر جنابه

جدي وجدك ما شروا باب لله
وديوانهم ما يوم كد صك بابه

خذوا من الطوله انهال وعله
انشد وتعطيك الرجال الاجابه

والرجل كانه واضح الدرب ظله
ان عاش والا مات وش ينبغى به

من كان خالف عادة اهله لعله
عساه يفنى ما يكمل شبابه

اليا لفاك الضيف باشر وقله
يا مرحبا في ضيفنا مرحبا به

وقلط له الميسور والوَجْد كله
مما تجد واحسب لضيفك حسابه

الضيف لو انه قعد لا تمله
ما شاف منك اليا انتحى به حكى به

خلك على طول الدهر مدهل له
تراه رزقه حين يلفي لفابه

ترى البخل ما زوّد المال غله
ومن باع مردود الثنا ما شرى به

وترى الكرم ما احدث بالاموال قله
يا ما كريمٍ راس ماله نما به

واللي يجيك مسيرٍ من محله
له حق يكرم في شروط وحزابه

احد اقراه من اخضر البن دله
واحدٍ يبي حيلٍ تهصر عقابه

وربك كريم ولا بلى في عضله
وكلٍّ على قيسه يفصل ثيابه

واليا زبنت ازبن جبال مطله
ترى الوطى ما زبن اللي لجابه

قال السديري قول يازين دله
يا زين قول الحق للي مشى به

يقول قصرٍ ما يظللك ظله
خله عسى مبناه يصبح خرابه

والجهل للابدان مرهق وعله
واللي تداوى بالجهل ما بدى به

واخوك تدمح كان جا منه زله
وعمك ابوك ان طوقتك الذيابه

وعدو جدك مثل عدوان مله
منه العسل سمٍّ ذحاحٍ شرابه

واللي يجيك من القريب احتمله
عند القريب ارخص غلى ما ادعابه

تجنب اللي يزعله حشمةٍ له
وبالك تدور بالقريب الكسابه

وان كان خيله نافضت بالاجله
ارحل وخل الجو للي ربى به

تراك لو تسكن على صلو مله
اخير من ذلٍّ وساعٍ اقبابه

ابن الاهانه لو يكن بني خله
كبه وقل له يا حمد لا هلا به

والحق طاوع صاحبه وانضعن له
الحق مدرك من عصور الصحابه

واللي يبي درب الشكاله يدله
اما الحذر تقرب طريق متشابه

والكذب راس العيب دقه وجله
ورجل غناه الكذب مدقوم نابه

والشر لا تفتح لبابه سجله
ما دمت تقدر دافعه في صلابه

وان كان خصمك بيرق الحرب فله
خذ وجه خصمك قبل شن الحرابه

خلك على طول الدهر محتسله
قبل يجيك بغارة ما تجابه

وصم ارمضان ووارد الفرض صله
ومن حج بيت الله جزى في ثوابه

وحيلك على اضعف منك لا تستغله
الله قوي ومن تكبر رمى به

ومن ذل دون الحق ما فك بله
ومن فك حقه سيف عزه سعى به

ومن راد غير اللي قِسمْ ما حصل له
ومن طاع نفسه كيد نفسه غدا به

وأجلك ما ادنته القلوب المغله
من قرْب يومه زرفلت به ركابه

والطبع قالوا بالاوادم جبله
ما ينعدل راعيه لو به ذهابه

والجود لولا الكود كان استحله
رخو العضود وقرّشه في جرابه

لاشك ضلعن من هقابه يغله
لو هَمّ يرقى النايفه ما رقى به

وهرج النمايم ترِّكه وسط سله
لا تعتني بالهرج واللي عنى به


ما سمع جاب وما سمع منك شله
ذا منهجه واللي لنفسه رضى به

كم فرقوا ما بين خل وخله
عِمْلٍ شنيع وسالكين ارتكابه

ومن جاك له مشكل اتحاول تحله
لو كان ما تربطك فيه القرابه

لولاه مرهي كان حطك مزله
دوَّر بدالك واحدٍ فيه ثابه

فالعد يعرف عادته من مهَلِّه
والرس يسهجها البشر ما درابه

ولا تقرب دروب الكيانك امخله
ترى الشرف لا راح ما شي جابه

واحذر حلال الغير لا تستحله
لو ان قاضي المحكمه لك قضى به

وترى رضى والدك به من رضى الله
يقوله الله في مطهر كتابه

ودنياك تقضي باختلاف الاهله
والرابح اللي طاعة الله زهابه

سود الليالي ما به احدن صفن له
واللي صفن له يوم باق عذابه

وبسم الله انهيها وفيه استهله
وصلاة ربي عد ما امطر سحابه

على الذي دينه دعم بالأدله
وآله و من والاه هم والصحابه