عيدكم مبارك وكل عام وأنتم بخير
أبت الا أن تعايد سمو ذائقتكم قبل العيد
قالوا تهوجس قلت ماني خلي بال=ولا فيه عاقل سالمٍ من هجوسه
قالوا ترى الهوجاس يلحق على الحال=قلت الله أقوى عاينوا في يبوسه
لا ارتاح حالي حال من بين الاحوال=تجيه صلفات الروابع تحوسه
أعوام وهمي داخل القلب نزاّل=مفلّي بخبوته ويشرب رسوسه
مطاول المنزال ماهوب رحال=ويرسل على خافي الضماير عسوسه
ولولا اني أصبر وأدفع الياس بأمال=نذر ان يجف العمر وتذبل غروسه
الله من عبرة حزن دونها أقفال=ووّنة ألم بين الضلوع امحبوسه !!
أخاف لايشمت علي كل ختّال=وأروح لقمه سايغه في ضروسه !
لكن أسجّ الرجل بقفاي وقبال=في نجد .. بحزومه ونايد طعوسه
وأهيم وأعدي على راس ماطال=وأبعد مشاويحي وأخفّي رموسه
مالي ومال المال واسواق الاموال=مثلي غناته يوم تضفي لبوسه
وأصد عن شوف المقاريد الانذال=أهل الوجيه الكالحه والعبوسه
نقالة الهرجه خبيثين الاعمال=ألي يخلقون بحلا الهرج سوسه !!
لحاّنة للكذب في كل مواّل=وموكدينه فاليمين الغموسه
عيدٍ لعيني فراقها ذيك الازوال=كني سجينٍ مطلقٍ من حبوسه
أدله ليا هفيّت عن بث الارسال=وعشيّت في خدٍ جديدٍ عروسه
وقام يتلاعج بارقٍ يشعل اشعال=والله مـ .. اغبط الراجحي في فلوسه
أنسى همومي كلها دق وجلال=ولاعاد تطري صوب قلبي حسوسه
الا أنت يلي ماأستمع فيك عذاّل=يامن عليك ازروع روحي امحموسه
انساك ؟ كيف انساك ؟! ذا ثامن امحال=مادامت بصدري تردّد نفوسه
لك في خفايا الروح منزل ومدهال=ومحبتك بـ .. أقصى الخفوق امغروسه
ولو الغلا يورث على دب الأجيال=لـ .. اوصي بغلاك مع جرح قلبي وموسه !!