السلام عليكم ورحمة الله وبركاته
أعتذر أشد الاعتذار عن الانقطاع وعدم التواصل مع الردود التي أعدها أوسمة على صدري
ولي رجعة على هذا الموضوع الذي يحرجني أشد الحرج ويزيد مع كل رد على مواضيعي المتواضعة
أعزي الأمتين الأمة الإسلامية والعربية في وفاة فقيدهما خادم الحرمين الشريفين الملك فهد رحمه الله وغفر له وأسكنه فسيح جناته
حقيقة تصبرت وواريت الدموع ولكن دموع ابو متعب بيحت المكنون
يا عين هاتي دموعن كان مخزونة=اليوم يوم البكا تكفين هاتيها
من شفت ابو متعبٍ والدمع بعيونه=ودموع عيني على الخدين مصخيها
ادري يابو متعب ان الروح محزونه=وادري عن الدمعه اللي باح خافيها
وادري عن الغالي اللي شدت ضعونه=وادري عن النفس لا من مات غاليها
لكن قلبي وربي فاضت شجونه=يومن دمعتْك منديلك يواريها
فزّت معاليق قلبٍ باح مكنونه=لبّى دموعك يابو متعب ولبّيها
ان كنت تبكي فكل الشعب يبكونه=ولو تفتدى الروح باذن الرب لفديها
يبكي فهد يا عضيد الفهد وامتونه=كل المخاليق قاصيها ودانيها
يبكي فهد امة الإسلام واركونه=ومآذنٍ في جميع الكون بانيها
وتوسعة بيت رب الكون مقرونه=باسمه على غُرّة التاريخ يحكيها
ومصاحفٍ في مساجد الارض مركونه=اقر اوّلتها وتلقى الفهد مهديها
العاهل اللي به العدوان مغبونه=يعزّ من قاربه ويذلّ شانيها
( مات الفهد ) كلمة بالحزن مشحونة=ضجّت لها الارض واهتزت رواسيها
حتّيش لو هامته في الارض مدفونة=قبله رسول البرايا قد دفن فيها
على محجّة محمد لفت كفونه=تدعي له الناس وتزفه بياديها
من فوق هامة هل التوحيد مصيونة=لو تنشرى رجعته بالموت تشريها
ما جصّصوا له ضريح الشرك يدعونه=على الشريعة بغى اوّلها وتاليها
عسى السحاب المنشّي تسبل مزونه=على ثرى تربةٍ بالعدل ماليها
يالله ياللي جميع الخلق في شونه=ترحم عظامه ومن نارك تنجّيها
انته رجاه ورجا قلبي ومضنونه=ترفع منازله في الجنة وتعليها
لا دام ابو متعبٍ فالدّار مامونة=نبايعه بيعةٍ نفنى ونحييها
بيعة ولاءٍ لبو متعب وعربونه=الروح والنفس والدنيا وما فيها
قالها أخوكم المحب المنقطع
تأبط خيرا