السلام عليكم ورحمة الله وبركاته وبعد أعزائي منسوبي منتديات قبيلة الدواسر الكرام إدارة ومراقبين ومشرفين وأعضاء وزوار أسعد الله مسائكم بالخير والمسرات أقدم لكم هذه القصه والقصيده للشاعر المرحوم هجاج بن عيد الغياثات عندما كان في الخرج.
فيه سنه من السنين كانو الغياثات نازلين على الخرج للمقيض وبعد ثلاثة أشهر أي في الصفري رحلو الغياثات من الخرج بحثاً عن المراعي والمراتع الطيبة وتأخر بعدهم هجاج مع ربعٍ معه لمدة أيامٍ قلائل .
وفي يومٍ من الأيام أخذن الحريم لبن يسمى بالمسحوق في ذلك الوقت أي لبن البقر الصافي وقدمنه لهجاج بن عيد وقال ويش هذا اللبن وقالن له مسحوق من البقر وكانو يسمون البقرة بأم عثمان ورفض هجاج اللبن وأنشد هذه القصيدةواللتي يذكر فيها فعول بني عمه:
لبن أم عثمانٍ على الناس تهديــــه=والكبد عيَت من حليب أم عثمــــــان
صبَولي الشاهي ترى شرعتي فيه=وإلأ إحلبولي من لبن كل مسمـــــان
كم خايعٍ قدامها دجـتـنـا فـــيــــه=وقـدمـتـنـا نـجـعٍ كـبـيـره (وقـيــــــان)
جـلـَع سـلـفـهـم كـل قـبـاً تـبـاريــه=تبي الفرايس ماقرعوها بالارســـان
نروي عـيـدان الـقـنـا إليـا مـثـانيه=كـم شـيـخ قـومٍ عـلَقنا فيه الاكـــوان
سو البلا منَا على الشيخ نرميــــه=وإلأ لـزيـز الـشـيـخ راسه إليا بـــان
مثل المرضف 1 يوم ربي وحى فيه=وقـولـولـه الـكـربـي تـقـفَاه بطحــان2
وزيد بن نديله 3 مايباتن نواعيــــــه=خلي عشى للطير والذيب سرحـــان
وإبن جناجل 4 ذيب الأمغر يدربيه=وعـقــبـه بـيـومـينٍ قفاه إبن نوطـان5
وإلأ المحيا 6 اللي كبارٍ هقاويــــــه=يبـكـيــه لامــن هوَد الليل ظيفــان
شبيب 7 جاب الحجن يبي يقاضيــه=وكـثـرت جـنايزهم على جال بنبـان
وإلأ المهري 8 اللي جاب جمعٍ يقديه=خلي في مسدح الجضعي9 وإبن لحيان10
ذعذاع 11 جاء بيقطع وربي قطع فيه=ومن حـظـنـا الطيب كفابه عشيــران12
وهنا توضيحات لبعض الأسماء المذكوره
1- المرضف :هو فيصل المرضف أمير آل جابر من آل مرة
2- الكربي وبطحان من كبار العقداء وهم من آل عازب
3- زيد بن نديله أمير الشمل لآل حسناء قبيلة آل مرة
4- بن جناجل عقيد من عقداء آل فهيده آل مرة وهو من فخذ آل شريم
5- بن نوطان : هو حمد بن نوطان من آل جابر آل مرة واللذي قتله هو البردوح الغياثات
6- المحيا هو أمير الحناتيش من الروقه من قبيلة عتيبة
7- شبيب هو شبيب إبن الحجنة من قبيلة عتيبة
8- المهري : هو خزَام المهري أمير الدغالبه من عتيبة
9- الجضعي من العرينات من سبيع
10- بن لحيان أمير من أمراء السهول
11- الذعذاع هو أمير الزقاعين من السهول
12- عشيران هو عشيران بن حسن المنداع الغياثات
تقبلو ودي وتقديري وإحترامي للجميع
محب الجميع : دغش بن بطي الغياثات