في يـوم سبعـة عشـر بتالـي رجـب =ياليتني ما دخلت السوق وانـا اجنبـي
العصر مريت يوم السبت سوق الذهـب =لقيت مخلـوق لا هنـدي ولا مغربـي
من شوفته ما لقيت الا السهـر والتعـب =صار السهر والتعب من شوفته مكسبي
اللبس لبس اجنبـي والـدم دم العـرب =زولن ليا شافه الشايـب يعـود صبـي !
مكمـلن بالجمـال وبالحسـب والنسـب =قلت السلام وتبسم قال لـي وش تبـي
وليا تقربت مـن زيـن الحلايـا هـرب =واقول عطني الصراحة وانت ابو ما تبي
بغيت اعرفه وش اسمه مير ما الله كتـب =يقول ابي سمعتي واخشى على مذهبـي
تبيّن النور مـن خـده علـي واحتجـب =يا الله عليك الخلف تخلف على اتعبـي
انا قتيل العيـون النجـل سـود الهـدب =ذقت العنى والعذاب ولا حصل مطلبـي
قلت ارحم اللي طواه الهم وانت السبـب =قالت لعلـه يطاولـك السهـر بسببـي
قلت الظليمة حـرام بكـل حشمـة وادب =قالت معي عين وصانا عليهـا النبـي
انشد ولا يلحـق النشـاد لـوم وعتـب =انا غريب وقضى مايي وقضى منهبـي
انتي من اهل الكـرك والديـر ولا حلـب =قالت يشيب الولد ما حصل اللـي يبـي
قلت انتي من السويد اهل الفرح والطرب =قالت بلاد العروبـة رغبتـي وطلبـي
انتي من اهل الخليج مخصليـن النشـب =قالت من المسلمين وجد ابوي عربـي
واللي يقول الهوى كله خطر مـا كـذب =قلت اوعديني وعد بس اذكـره واكذبـي
قامت تعجب وقالت يـا زمـان العجـب =يا لايمه للغرام انا اشهـد انـك غبـي
عليك رسـم البـدواة والزمـان انقلـب =قالت عظامي ودمي واللحـم وعصبـي
انا من البدو كان الـدم وصـل الركـب =يوم السلاح المفتل والرصـاص حلبـي