ياوجودي وجد من حظه توطته الظروف=الظروف اللي رمنه صوب تقرير المصير
ولد امير(ن) عقب عزه صابته بقعا بخوف=غاب ابوه وغابت امه وللحزن اصبح اسير
عاش في دنياه هايم مالقا قلب(ن) عطوف=عمره اربع فوق عشره والولد توه صغير
مابقاله غير عم(ن)ظالم وشين الوصوف=وقعه على التنازل دون ذمه او ضمير
ماخذ(ن) مال اليتيم وماكله من دون خوف=والولد يادبرة الله طاح بيدين الحقير
وطرده من وسط بيته وقال لاعيني تشوف=زولك بديره وانا فيها وغدا وضعه خطير
قال له ياعم انا مثل ولدك ياعم روف=من بعد ماماتو اهلي مالي غير الله نصير
قال انا مانيب عمك كيف تنطق ذالحروف=روح دار ايتام والا روح مع شلة دشير
والولد من حر مابه قام يصفق بالكفوف=والحزن سيطر عليه وهلت دموع الغرير
وارتحل والقلب من خوفه كماضرب الدفوف=حاير(ن) يمشي ويتلفت على وين المسير
ماعليه الا شماغه والملابس ثوب صوف=ومامعه في الجيب الا صورة ابوه الامير
ماشي بدرب(ن)طويل(ن)مظلم(ن)ليله خسوف=تايه فكره بدنيا وش تواليها يصير
وعقبها جاوه ثلاثه وصوتو له بالوقوف=وقالو اركد لاتخوف توها الدنيا بخير
ركبوه وروحوبه وافعلو فيه أمعروف=واشتغل سايق لبوهم شايب(ن)عمره كبير
بعدها مرت سنين(ن)والليالي به تطوف=وماتو عيال المعزب وزوجه بنته عبير
وعقبها مات المعزب واورثت بنته الوف=وانتهض حظ اليتيم وصار له مال وعشير
وعمه الظالم جراله في حياته له صدوف=وضاع في ارض(ن) خليه مابها انس(ن) وطير
مالقا فيها موارد غير بير(ن)ومحفوف=بالافاعي والعقارب وضع هالظالم عسير
صابته دعوة يتيم(ن)كنها طعن السيوف=والنهايه صار موته لدغة افعى حول بير
فيصل بن جزاء