السلام عليكم ورحمة الله وبركاته وبعد أعزائي منسوبي منتديات قبيلة الدواسر إدارة ومراقبين ومشرفين وأعضاء وزوار أسعد الله مسائكم بكل خير وسرور هذه قصيدة قلتها في فصل الربيع ولاقت أصداء كثيره ولقد جاراني أخي وحبيب قلبي أبو سعد ( أبو حاجوووونه) ولقد رديت على أبو حاجووونه وسوف أقسمها على ثلاث صفحات الصفحة الأولى قصيدتي والثانيه مجاراة أبو حاجونه والثالثه ردي على أبو حاجونه.
قصيدتي الأولى هي
من ضاق صدره ركب وأفتر في بنده=اللي حداه الطفش واللي له أشغالي
والناس باأفكارها كل على قده=ولولا أختلاف النظر ماجابها أشكالي
والناس كل يبي يمشي على ودَه=كلٍ يدور لشفه قدر ماأحتالي
وأنا هوايه وشف البال باآعدَه=ممـشاً بوسط النبات ودمث الاسهالـي
خص أليا زاف عشبه وأرتفع فنده=متخالط زاهره من كل الاشكالي
بأركب على موتر مادور الكدَه=مايوم وقف على الركاب يشتالي
شد الخواجه جديدٍ مانقل عدَه=فيكسار فتحه ومكره وارد التالي
راعيه لاجاء لزوم البر ماردَه=يبغيه يطوي بعيد الخط لو طالي
فيازين ممشى البريمي لالحق حدَه=مع سهلةٍ خاليه ماطبها أزوالي
يبغي ديار كساه النبت من مُده=فيها فراقين نجع البدو نزالي
نجعٍ مقيم ونجعٍ في طرف شده=ونجعٍ على السير ينزل طيب الفالي
واللي سرح في الدبش من القفر مارده=متشوبشٍ في هوى السرفات الاجهالي
لاجيتهم يمضي الاسبوع ماأعده=أعيش معهم وقلبي داله سالي
أسج معهم وعند الله ماعنده=مادمتنا حي بمشي في هوى بالي
والعمر محدود حده لاأنتهى حده=لابد من حفرةٍ بالرمل تنهالي
هذا هوايه وشف البال مع وده=البر وأهله ربيع القلب والحالي
والناس بأفكارها كل على قده=ولولا أختلاف النظر ماجابها أشكالي