السلام عليكم ورحمه الله وبركاته
اسعد الله جميع اوقاتكم اخواني وأحبتي اعضاء منتدى
قبيله الدواسر الرسمي
ونعتذر عن الفتره التي غبت عنكم فيها
هذه قصيدة اضعها بين ايديكم وأتمنى ان تنال إعجاب الجميع
بنت انا وياك حكم الوقت حاكمنا أتباعه=والظروف القاهره يابنت تحكم باجتماعي
ولا انا ماعاد لي وياك يابنت أجتماعه=واعتبر ماراح من عمري مع مثلك ضياعي
عشرتك يابنت عقب اليوم مافيها طماعه=جعل حبل الوصل يجري به من الصبح انقطاعي
مع مرور الوقت انا يابنت جاء عندي قناعه=بارد الاحساس مثلك مايغير له اطباعي
كم تعذرت وجعلت الوقت لأخطائك شماعه=والليالي بينت لي كل ماتحت القناعي
ياعدو الصدق ياغشاش ياشين البظاعه=ليه ياغدار تسعى طول عمرك في خداعي
كل ماتامر علي اقول لك سمع وطاعه=وانت تدري لا أمر غيرك ماقبلت الانصياعي
من هواك اصبحت مسلوب الإراده والشجاعه=اندفع لك وانت تتهزاء بحبي واندفاعي
ماتقدر من على شانك عصى كل الجماعه=صادق بالحب لك ماهو مثل حبك صناعي
من يراعي خاطرك يابارد الاحساس راعه=طول عمري وافي لك وانت تتعمد اوجاعي
من نصحني عن سوالفك القديمه قلت اشاعه=قلت حساد الهواء يبغى يزيد من التياعي
ياعشيري لاتحسب ان قلب عشاقك رعاعه=والله اني قلبي على غيرك مثل قلب السباعي
من رقا ذروة سنام الحب ماعودّ لقاعه=ومن سواتي كيف يرضى بالطمان من الرفاعي
ماحداً قبلك ولابعدك جرح قلبي ولاعه=بالجفا واليوم منك اشواق خفاقي ارياعي
والله اني ماتنازل واتلمس لك شفاعه=لو رضى قلبي وسامح ماقبل عقلي وطاعي
صار عندي من نتايج حبك الكاذب مناعه=صرت أأثر ما تأثر طال بالتأثير باعي
لاسقى الله يوم عرفك ساعته لي خس ساعه=ذكرتني كلمه لي قلتها من دون داعي
الغلا باصك بابه والهواء بطوي شراعه=ويش ابي من حبك اللي ماوراه الا صداعي