[معلومات العضو راعي البرصا]

قال منهو جعل ربي مايحده = للوجيه اللي منافعهم زهيده
من همومٍ فالضماير مستجده= وده يكتمها وحماها شديده
سامعٍ له نغمةٍ ماهوب وده= وحدثت في خاطره صدمه جديده
يشحن الجوال والفكسار عده= للمطاريش القريبه والبعيده
نصه اللي طيب عوده مستمده= صوب اخوي هتيل يالمندوب سيده
بلغه مني سلامي والموده=وسلمه خطي ومضمون القصيده
الزمان مظيم وانيابه محده=وفالقسا مال العضيد الا عضيده
كم رفيقٍ بالشدايد مانعده=لو يساوي مال قارونٍ رصيده
خابرينه دايمٍ مافيه شدّه=ولأستشرته جاك شيٍ ماتريده
طير ابن برمان هده لاتشده=واحمد الله كان ماجاك بمكيده
الرفيق اليا استشارك فأمره قده=واجتهد له في مساعيك المفيده
والكلام الزين يالمنعور بده=واعتذر له كان ماتقدر تزيده
لاتشمت به لياجا الوقت ضده=فالشماته خصلةٍ ماهي حميده
الروا نعرف مواريده وعده=والفرج عند الذي الافلاك بيده
قد وردنا العد يوم الوقت شده=وانتزعنا مطلب النفس الفقيده
والسلام ختام صرحٍ مانهده=واختلاف الراي مايفسد عقيده