القهوة العربية كانت علماً على الكرم والرجولة والطيب في تاريخ الآباء والأجداد وقد تغنى
بها الكثير من الشعراء ومدحوا كثيراً من الكرماء الذين عرفوا بالكرم (وقهاويهم ) نسبة
إلى القهوة ( مبرهجه) أي مفتوحة طوال الوقت وكانت النار لاتسمد بل كانت مشتعلة
طوال الوقت (والدلال) بالوجار على جانب النار ...
و من الذين ذكروا في قصائدهم القهوة و شبت النار واشتهروا بهذه الصفات نذكر على
سبيل المثال من سارت بأخبارهم الركبان وكانت بيوتهم (ملفى للخطار) وعابري السبيل ...
ومن الشعراء القدامى والمعاصرين ..
وهذه قصيده للشاعر / عضيب بن شلاح الحربي
ياما حلا عقب العشا شبة النــــــار = عقب الهجوع لا رقد كل كوبـــــــه
بقفرية ياعبيد يودع له اشعــــــــار = وسواة فنجال يشوق بصبوبـــــــه
حبه على المطلوب من بن وبهــار = يعجبك بالفنجال صبغه وروبـــــــه
كيف يجوز لشارب الكيف والكــــار = لو دوروا به غمزة مــــا لقوبـــــه
في مجلس فيه المشاكيل حضــــار = بغيبة ردي الحظ عنهم بنوبــــــــه
اللي يخزوون المسير بالانظـــــــار = تكاظموا واللي جليس شوشوبــــه
تلافتوا على بعضهم بالانظـــــــــار = وتغامزوا مابينهم وضحكوبــــــــه
الناس فيهم يافتى الجود هــــــــذار = مسترحل لبليس زين ركوبـــــــــــه
عراض غرة مسلم غافل غـــــــــار = يعرضه للناس لو ما حكوبـــــــــــه
دايم لغرات الاجاويد عقـــــــــــــــار = يظهرعيوب ولا درى عن عيوبــــه
وفيهم تبيني لايسرك ولاضـــــــــار = ما غير يحسب للربايع ضروبــــــــه
وفيهم حصيني قبوع قمــــــــــــار = يوصف على ماقيل به طير ذوبــــه
وفيهم بليهي على الكود صبـــــــار = يصبر ولو زادت عليه الصعوبـــــه
لا جا زمان فيه غلين الاسعـــــــــار = غدى لربعه بالمكاييل جلوبــــــــــه
وانا جا نهار الضيق بالموسم الحار = يرخص بعمره مايعد محسوبـــــــه
الشيخ هايس بن مجلاد الدهمشي العنزي
قم سو ما يجمد على الصين يا ذياب = بدلال يشدن البطاط المحاديب
إحمس إلى من العرق فوقها ذاب = واستدن ما يجذب عليك الشراريب
والى انطلق من ثعبته كنه إخضاب = ورسٍ صبغ بكفوف بيض الرعابيب
عدّه لمن قاد السرايا للاجناب = له مفرسٍ يشبع به الطير والذيب
والثاني اللي لا لفى بيته إركاب = قدام بيته مثل جزر القصاصيب
والثالث اللي وان غشى الزمل ضبضاب = يرخص بعمره دون زمل الرعابيب
وباقي العرب يكفيهم التول وان شاب = قضّـابة المجلس حمير المشــاعيب
اللي نهار الكون يفزع بمصلاب = كبار النفوس وساهجين المواجيب
وهذه قصيدة الشاعر صالح بن عميرة النتيفات
لا والله الا ناسبت شبت النار = والبرد قام يحوفها من شمالي
عندي لها في العايرة كن واوجار = قربت به عيدان سمرٍ اجلالي
في مجلسٍ متشطرس في ذار اجدار = يلقى على يمنى المسيّر اموالي
يا زين شب النار به بعض الامرار = متحري مسيار بعض الرجالي
احد بعيد الدار واحد لنا جار = واذ من بني عمي وذا من خوالي
وانقضي المجلس سواليف واخبار = مع ما هوى ببطون صفر الدلالي
ومربع بين المناعير بّوار = وان برت به لا حل جوفي حلالي
والى حصل مجلس ونارٍ وخطار = اصبح وانا بالي من الهم خالي
احب ذا واحب غمرٍ كذا سار = ولانيب انا اللي بس احبه لحالي
كلٍ يحب الخير وافعال الاخيار = الا الردي لا غلي ولاهوب غالي
قصيدة الشاعر مطلق بن ناصر ال طايع الهاجري
الــنــوم لــــوم وشــبـه الــنـار نــومـاس=لــحـق عــلـى نـــارك حـطـبـها وزيـــده
اجـمـع لـهـا جــرومٍٍ مــن الـرمث يـبّاس=نــطـرد بــهـا ســبـرا الـبـطـين وجـلـيده
ولــيـا قــربـت مـــن الـمـعاميل لا بــاس=انــتـاش مـــن صـنـدوقـها الــلـي تـريـده
مــطـرافـتـيـن ودلــتــيــن ومــحــمــاس=والــشــت والـمـلـقـاط والــنـجـر وايـــده
وعـويـديّـن يــطـرد خـــوا كــل رمّــاس=وحــسـاويـن فــــردة اخــلاصـه فــريـده
والـمـا تـلـقا لــه مــن الـسـحب بـطـياس=امـــــن الــسـحـابـة لـلـمـعـامـيل ســيــده
الــدلــة مــــا نـاشـهـااهـجار واشــمــاس=بــالــنـار والـــبــن الــيـمـانـي عـهــيـده
كــاري وكـيـف الــراس مـفـتاح لـوناس=انــــا وهــــي مــثــل الـصـغـيّر وديـــده
احـمـس ودق ولا يـجـي فـيـك هـوجـاس=اتــنــوش مـحـمـاسـك إلـهـبـت الـوقـيـده
ولــقّــم وزل وحــــط لـلـهـيـل حـبــاس=الــيـفـة الــلــي جــلــد جـــذع وجــريـدة
والــيــا تـقـهـويـنا وطــــار الـتـعـومـاس=الــفـصـل الاول عــيــد نــــاره وعــيـده
وهذه قصيدة القهوة لابن عون و التي يقول فيها :
يا ريف قلبي للمسايير قم شب = و حط المنارة في طويل الظلالي
عقب تشق الها لجزل الحطب جب = و هات النجر و أحضر جداد الدلالي
ثلاثٍٍٍٍ الهن راعي الكيف يطرب = و سوطهن ضمّر و الاخر جلالي
و الرابعة ملقامةٍ لونها أصهب = حيث انها للنار دايم تصالي
و لا جبت كل شروطها اللي تطلب = اجلس عليهن يا زعيم العيالي
و احمس لنا بريةٍ حبها أشهب= وبهارها هندي و ماها زلالي
و اعرف ترا قانونها وا يخرب =و لاندارها ينقى و ماها يكالي
تراه ما يصلح لها كل مذهب = و لا تقبل الراضة ولا الاعتجالي
اليا حمست احرص على حمسةالحب=واعرف ترا الحمسة تبي وسع بالي
تأخذ على أدنى الجمر فترة تقلب = لين العرق يطلع سواة اللوالي
و من يوم يطلع فالمبرد لها كب = لين الندار ان كان فيها يشالي
و اليا خذت مقدار للنجر قرب = و دنه بصوتٍ يسمعه كل غالي
و دنه و خله للمسايير يجذب= لا قام صوته للنشامى يلالي
يوحونه الجيران لا قام يقنب = يجيك الأقصى و القصير الموالي
و عقب تدق البن لقم وركب =لين انها تسمح من الاجتوالي
و قبل تبهرهاعن النار تجذب = و تركد شويه لين يصفا الحثالي
و برويد في حدا المباهير تسكب = من عقب غالي الهيل فيها يهالي
و اعرف ليا بهرتها يا المشبب = تراه يكفيها من النار صالي
ثم اجذها من يوم بالهيل تقلب = و من يوم تركد صبها للرجالي
حتى يجي الفنجال منها اليا صب = بين الشقار و بين لون الشعالي
اما أشقرٍ رايب مثل بول الأرنب = و الا اشعلٍ يشبه لدم الغزالي
يطرب لها من كان للكيف يشرب = كيف النشامى اللي من العيب خالي
و اعرف تراها عادةٍ ما تسيّب = ولا ينتقدها الا قصير الحبالي
احرص تخلي عادة الجدو الأب= ما هم عليه أول عليه أنت تالي
تراك من كل المناسب معرب = ما بين جدان و عمام و خوالي
و أبيك عن منهااجهم ما تجنب = ان كان فكنّك بنات الليالي
قصيدة الشاعر الأمير / زيد بن سلامة الخوير رحمه الله
قال الذي يبدع على كل قافي = من ضامرٍ ياتن رْيامٍ مواليف
بمنومسة لقم على بكر صافي = عليه من شغل ابن سكران توليف
خلّه ليا ماتونس النذل غافي = وقرب دلالٍ مثل بطٍّ مهاديف
بدلال ماعنهن سنا النار طافي = بوجار من لادونهن بابهم جيف
مبرهجٍ تسفي عليه السوافي = من خلْقته ماطق في ركزة السيف
واحمس ولقّم بالعجل يالسنافي = بشاميةٍ طرّف لها الجمر تطريف
حماسها قرمٍ من الغوش شافي = دايم يقلبها حريصٍ على الكيف
وزلَّه وصَفَّه عن سريب المصافي = من خوفة أحدٍ قال بالكيف ياحيف
كِنَّه ليا منه غشاها الرّعافي = نثر الذّهب من فوق لوح المشانيف
وبهارها من يمّة الهند لافي = في مركبٍ يقداه زجر العواصيف
وان كان تزمل من طيورٍ هوافي = بيضٍ فسدّ أفواهها باشقر الليف
فنجالها لاشف بين الأشافي = لاكن يجذب من شفا شاربه شيف
يبرالها من مير فِجّ الخوافي = بكايرٍ تِرْمَهْ سهيلٍ ليا شيف
صبه لمن يثني خلاف المقافي = يوم الفرنج يقذِّف الملح تقذيف
ونفَّل بها اللي للمروات وافي = مادوَّر التَّجْرات به والمصاريف
اللي لياغليت شراها جزافي = مارطّله عند الدلاليل بنصيـف
ياسامعٍ مني علومٍ تشافي = خذها من اللي نافلٍ كل عرِّيف
دنياك لو ضحكت تراها بخافي = يبرم دواليب الشِّقا والتكاليف
إنهب منه من قبل مالعمر يافي = صيٌّور ماتقفي ركابك مواجيف
صيُّور عمرك ناهجٍ للذلافي = سمر الليالي تكمله بالتتاليف
صيُّور مايمسي لظى الجمر = طافي دنيا تفرق كل ربعٍ مواليف
وليا حصل عزٍّ مع الكيف كافي = ماني على الدنيا كثير التحاسيف
اخوكم في الله
محمد الغريري