البارحه يوم استمديت الافكار = واستدرجن هاجوس راسي على الفور
أخذت لي في محور الكون مشوار = من هجعة الغافي إلى فجة النور
انا بدار وهافي الخصر في دار = دونه زمت جرد الجراهيد والقور
حبه جذب روحي على الشرق محدار = وأمسيت دار اللي له القلب ماسور
أرجي وأراجي وأترجا هل الدار = رجوى يهود المانيا وعد بلفور
لو المدى بعد المسافه والاقطار = جيته لو إنه ورى شط لاهور
كني من اللي يطرق الروح زوار = قبر الحسين بكربلا عشر عاشور
أسباب من عسكر على الكبد مسمار = ما عاد خلابي من الصبر مذخور
رجلي مدارجها رفيعات واعسار = وبالدرب ما تنساق مع كل مثبور
والعين ما لدت على حرمة الجار = ولا ساقة النظره ورى كل غندور
خفيف نفس إليا تلقيت خطار = نقال كبر بمجلسٍ فيه مغرور
ياللي خذابك مركب الشوق معبار = فكر ترى المخلوق منهي ومامور
ارفع شراعه كان شفت الهوى دار = خله يفرق هادي الموج بالزور
وإليا استوى صنع الطبيعه بالانظار = بين ازرقينٍ لا معالم ولا نور
إقده على النجم الشمالي إليا سار = وباقي الكواكب لو تعلى حدر دور
يرضيك ربان السفينه بالاسفار = البر بيّن والمتاهات ببحور
إحذر إليا ضاق الفضا والبحر جار = عن الغرق يرسي مراسيه بنجور
تمت وصلى الله على سيد الأبرار = اعداد ما يذكر على الكون مذكور