بسم الله الرحمن الرحيم
السلام عليكم ورحمة الله وبركاته ... وبعد
هذه القصيده جاءت رداً على قصيدة الشاعر القدير:خلف بن هذال العتيبي
والتي ذكر فيها تفرد قبيلة عتيبه العريقه بسلم وسم العصا
والذي ذكره في هذه القصيده:
يابنت ياللي تطوي الثوب الأرداف=شط الحوار بدر بكرٍ يميحه
في مرتعٍ عشبة تغريف تغرياف=وأمه هجل ماشملوها منيحه
والعنق عنق مذيرٍ عقب ما شاف=بوارديٍ لاقفٍ له بضيحه
والعين عين موحشٍ راس مشراف=يملا عيونه بالفجوج الفسيحه
يابنت مانرضى المهونه والاضعاف=لنا على روس المشاريف صيحه
لاتنشدين عن المنازل والاسلاف=يوم اذكر الماضي تهيج القريحه
فينا صفات الطيب يابنت واوصاف=ما تنطبق في غيرنا يامليحه
دخلينا يرقد ورى الوجه ما خاف=يامن وتحماه السلوم الصريحه
ناسم عصاه ولو يبي حج وان طاف=تحت الحمى ماواحدٍ يستبيحه
وانفوسنا دايم عفيفات وانظاف=وابدانا من كل عله صحيحه
صاحين صافين المشاريب واشراف=ماناكل المتردية والنطيحه
وان ثارت الهيجا لنا وفد واطراف=وجه الحريب نقنعه بالفضيحه
وصلبين في وقت الشدايد وعراف=منا المشوره واختيار النصيحه
واكرام لو يلحق بنا نقص واخلاف=نملى الصحن ونلحفه بالذبيحه
يوم السنين الماضيه حيل واعجاف=ينقل لنا من هبة الريح ريحه
والعيشه اللي تدبل الكبد تنعاف=النفس عن ما تكره مستريحه
دنياً تموج ولا رسمنا لها اهداف=ياما تحتها من فعلون قبيحه
اتجهز الغازي وتسرع بالانكاف=ولا تنكف الا بالفلس والقبيحه
وهذا رد ينفي ما ذكره الشاعر ويوضح الإلتباس:
يالله يامنزل تبارك والاعراف=ياللي نصرت اهل الوجيه الفليحه
طالبك يالمعبود من جودك اسعاف=عقب المحل تسقي الديار الشحيحه
من رايحٍ يسقي الصحاري والارياف=يجعل مزابير العدايم جريحه
سلام ياعتيبه على روس الاشعاف=تسليمةٍ فيها المعاني فصيحه
يا اهل الوفا والطيب في كل ميقاف=واهل الفعول الوافيات المديحه
وان صاح صياحٍ على الهوش هتاف=نطاحةٍ لأهل الوجيه الكليحه
واسلومكم عند المواجيب تنشاف=للطيب تاج وللمراجل وشيحه
لا شك بعض الهرج به زود واسراف=وان جاك من بعض الوجيه السميحه
قولٍ بدابه شاعرٍ يلعب القاف=شاعر وطن ماهوب لعب ومزيحه
قولٍ تقوله ياخلف ظلم واجحاف=سلم الدواسر يا خلف ما تزيحه
سلم الدواسر مروية حدب الاسياف=مطوعين اللي تزايد جميحه
قاسين للمخطي وللصاحب اصخاف=وجدار جار البيت تدي مطيحه
سلمٍ خذيته من هله وانت عراف=ولك حكمةٍ يوم الظروف اللحيحه
وسم العصا للدوسري حق وانصاف=وانشد وتعطيك القبايل صحيحه
تلقى من العراف تحليل واشراف=تنبيك عنه اهل العقول الرجيحه
ياموصف اللي تزهمك وصف مشعاف=في ماقفٍ لابد وجهك تشيحه
جاتك توسل وانت من يزهمك ناف=يامن ولو تثبت عليه الجنيحه
ترى المحنك يجحد الوصف لو شاف=ولا يذيع اوصافها في الشريحه
وحنا تحت حكم الشريعه والاعراف=عوايدٍ بين القبايل وضيحه
ناخذ حقوق ونعطي الحق شفاف=ولا نجامل كان الاخطا فديحه
والهرج ما يرجع على الزور لاطاف=ومن يعترف بالصدق ربي يبيحه
الشاعر : صالح بن محمد بن صالح ال شملان الحقباني
...