ويـن أنـت يا حــمـدان أمـك تـنـاديـك .. وراك مـا تسـمـع شكـايـا ونـدايـا
يا مسندي قلـبـي على الدوم يطريـك .. ما غبت عن عيني وطيفك سمايا
هـذي ثـلاث سنـين والعـيـن تـبكـيـك .. مـا شـفـت زولك زايـر يـا ضنايـا
تـذكـر حياتي يـوم اشـيلـك واداريـك .. والاعـبـك دايــم وتـمـشـي ورايــا
تـرقـد على صـوتي وحضنـي يدفيـك .. ما غيـرك احـدٍ ساكن فـي حشايـا
واليا مرضت اسهر بقربك واداريك .. ما ذوق طعم النـوم صبح ومسايا
ياما عطـيـتـك مـن حنانـي وبعطيـك .. تكـبــر وتكـبـر بـالأمـل يـا مـنـايـا
لكن خساره بعـتـني اليـوم وشفـيـك .. واخلصت للزوجه وانـا لي شقايا
انا ادري انـه قاسـيـه مـا تـخـلـيــك .. قالـت عـجـوزك مـا ابـيهـا معـايـا
خليتني وسط المصحه وانـا ارجيك .. هذا جـزا المعـروف وهـذا جزايـا
يـا لـيـتـنـي خــدامــة بـيـن ايـاديــك .. من شان اشوفـك كل يوم برضايا
مشكور يـاولـدي وتشكر مساعيـك .. وادعـي لـك اللــه دايــم بالهـدايــا
حمــدان يا حمـدان امــك توصـيـك .. اخاف ما تلحق تشـوف الوصـايـا
اوصيـت دكتـور المصحه بـيعطيـك .. رسـالتـي واحـروفهـا مـن بـكـايـا
وان مـت لا تـبخل علـي بدعـاويـك .. واطلـب لي الغفران وهـذا رجايـا
وامطـر تراب القبر بدموع عينيـك .. مـا عـاد يـنفـعـك الـنـدم والنعـايـا