[معلومات العضو عبدالله الدوسري]

لا متى قلبي يكابد و يتأوّه=يرفع بصوتٍ و لا له من صداوي
لا تشالى ساعةٍ ليلين بوّه=كيف لو ما هوب بالعزّه غناوي
بين وقتٍ صعبٍ و حظٍّ مّموّه=بين عزمٍ خاوي و همٍّ مخاوي
ما بقى للصّبر من حيلٍ و قوّه=لا حبيب و لا طبيبٍ لي يداوي
يالله اللي باسطٍ قاعك و جوّه=عالمٍ من كان بالنيّات ناوي
منشيٍ بالجود و الرحمات نوّه=يا مجيرٍ مستجيرٍ لك رجاوي
من لجى بك يالولي شبّيت ضوّه=طاب كيفه و قرَبت منْه المناوي
ما يخيب اللي تردّى و أنت توّه=خذ بيدّي لا إفْرطت منّي الهقاوي
نجّنا من كل شيطانٍ و سوّه=و إهدنا للحقّ و الشّرع السماوي
كثّر اهل الدين و رجال المروّه=و إمحق أرباب الرّبا و أهل الرّشاوي
جدّد الإسلام من عرضٍ مشوّه=زيّفوا فيه الحقايق بالفتاوي
و عزّ شان العُرب بحزام الأخوّه=من عدوٍ كافرٍ ما هوب ياوي