السلام عليكم ورحمة الله وبركاته
مساكم الله بالخير للتــــواصل
قصيدة ارجو ان تقبلوها كما جاءت
لاصار مالي مع الأصحاب من قيمه=مانيب ميت أليا من صرت وحداني
تردعني العزه وتردعني الشيمه=عن مجلسٍ فيه ذل وفيه حقراني
الله ولا خوة اللاش وملازيمه=ماتعز شاني لا شك تحط من شاني
مانيب خطوى هبيلٍ عاش في ضيمه=لأجل المصالح يهين النفس ويهاني
أنا عزيز الجناب ومن هل القيمه=اللي تحوش الفخر في كل ميداني
ماأخاوي ألا عريبٍ من مفاهيمه=المرجله والكرم والطيب والشاني
المرجله منهجه والطيب تعليمه=والجود طبعه وبالطولات متغاني
قرمٍ تسوقه على العليا تعازيمه=أن غبت ينشد وألى من جيت حياني
هذا نديمي وأنا أفخر فيه ونديمه=والله ماأدور بداله صاحبٍ ثاني
واللي سواته جعل رب الملا يديمه=ويمد عمره ويجلى عنه الأحزاني
هذا كلامي وبه بيتين تختيمه=بيتٍ على خاطري وبيتٍ على لساني
الصاحب اللي مقاديمي مقاديمه=هذا رفيقي وأعده سابع أخواني
واللي مقفي كذا نخفي معاليمه=واللي يبيني يدورني ويلقاني؟
وسلامتكم