[معلومات العضو فراج بن فهد آل تركي]

السلام عليكم ورحمة الله وبركاته :

أما قبل :

أتمنى من الإخوة الذين تشرف جوالي بإحتوائه على أسمائهم أن يرسلوا
لي أرقامهم عبر الخاص فقد فقدت جوالي على يد أحد اللصوص سامحه الله

أما بعد :

فهذه مجموعة من القصائد منها الجديد ومنها القديم أتمنى أن تحوز على بعض رضاكم
وأعتذر عن الإطالة :


(( نحن وبغداد وأسعار الأرز))

بغداد لاترجين مـن قومنـا تْفـز=صرخة جروحك ماوصلنا صداهـا
فيك الشرف ينهان والروس تجتز=وأمٍ ترمّـل ثـم يُذبـح ضنـاهـا
لادمعـةٍ طاحـت ولاقلـبٍ اهتـز=ماتـت مشاعرنـا ومتنـا وراهـا
تبكين من جور العدو يوم يبتـزّ..=أرضك , وقواتـه تغطّـي سماهـا
وتبكين عـودٍ بالعصـاة ايتعكّـز=بعد اقصفوا داره وسـاوت ثراهـا
جثث عياله تحت الأنقـاض تبـرز=ومما رأت عينـه تمنـى عماهـا
وتبكين عذراً في الزنازين تِحجـز=ثيابهـا تِنـزع ويوجـع ابكـاهـا
تصيح وتنادي وتنخى .. ونعجز ..=نصغـي لهـا وألا نلبـي نداهـا
قولي لها لاتذكـر المجـد والعـز=هـذي أساطيـرٍ وكـلٍ نسـاهـا
إنا قضيتنا : غلا ( كيسة الـرز)=الله ياخذ من سعـى فـي غلاهـا

هذه قصيدة وجهها إلي قبل أسبوعين
الأخ الشاعر خلف بن غصاب آل فراج الشكره :

أنا أشوف وضع الحبل فوق الغوارب طال=وروسٍ تهزهـز خـوفٍ تقـول منهبلـه
مرتهم غدت رجال وتهوش هوش ارجال=كديش العرب عنتر وهـي كنهـا عبلـه
زمـانٍ ورثنـا خوفـه وقمعتـه واذلال=ندور بفضى فاضي وضيقٍ كمـا الدبلـه
تقول اندثرنا من الوجود وغدينا أطـلال=غدا الأبلـه العاقـل وراع الغنـم بإبلـه
كتمت المشاعر عدة أشهر وضاق البـال=وأبشكي علـى فـراج والكبـد مندبلـه
تسلط علينا الفرسـي الساقـط الزبـال=غدا العالم أخرس وأطيب الناس صار أبله
غدا يومنا سرمد وليل العنـا بـه طـال=عقب مارحل أسدٍ وقبلـه رحـل شبلـه
ويش الحل يا مشكاي هل يذكرون رجال؟=وهل به أمل بنعدي الشوك مـن حبلـه؟

وهذا جوابي لقصيدة أبوغصاب :

بيوت الجزالة مثـل غيـثٍ عقـب الإمحـال=تكاشف ابروقـه فـي الدجـا وانحـدر وبلـه
لذا ياخلف معذور مـن هـو شكـى الغربـال=وقـام ايتمنـى أبياتـك اليـوم تنسـب لـه
وأنـا والله أنـي ياخـلـف فـاقـدٍ هــذال=ومشعـي وأبـونـواف وأيامـنـا القبـلـه
وأنـا كلمـا برّقـت فـي حاضـر الأجـيـال=رأيـت السعـادة طاحـت زهورهـا الذبـلـه
أشوف العرب مابين الأسهـم وسـوق المـال=وهـذا علـى عـوده والآخـر علـى طبلـه
ما أظن النصر ممكن وحنـا علـى ذا الحـال=ياكـون انخضـع للـي جعـل بيتـه القبلـه
لامنّا قضبنـا الديـن فابشـر بطيـب الفـال=ونصـرٍ مـؤزّر مــاش بـعـده ولاقبـلـه
وإذا صال " ابن متعة " فقل له : بلاش اخبال..=على الهـون ياهبلـه علـى الهـون ياهبلـه
بيلقى السبـاع الضاريـة تحتمـي الأدغـال=ويرجـع كسيـرٍ مختـلـط حبـلـه بنبـلـه
لكـن لإستمرينـا علـى سابـق المـنـوال=فلاترتجـي شــوف الزمالـيـق والربـلـه
رجانا عسـى الله ياخلـف يصلـح الأحـوال=بعـد مـا تجرعـنـا المرارات مندبـلـه
بنصبـر يـا أبوغصـاب ويحلّهـا الـحـلاّل=ولـو وقتنـا بكبـودنـا يلـعـب السبـلـه

(( الدجاج الفرنسي))

ياذا البخيل اللي مع النـاس منسـي=بالك تلوم الناس لاصـرت مقمـوع
على حسب الأفعال قبل أمس وأمسي=تلقى جزاك اليوم والشـك مرفـوع
الطيّب يجلّس علـى أعـز كرسـي=وألا الردي ياقف ورى الباب ملطوع
وفعايلـك ماغيـر حكـيٍ وهلسـي=وأغلب أحاديثك ضعيفٍ وموضـوع
تمضي ثلاث سنين وأربع وخمسـي=ماقلّط بمجلسك ضيـفٍ ولا اربـوع
وإن احصلت : جيت بدجاجه وببسي=وإن كثّرت : كيلو سمك قد له أسبوع
أما الذبيحـة كنهـا قلـع ضرسـي=أصعب على شرواك من حب كرسوع
الله يبارك فـي الدجـاج الفرنسـي=لولاه قد ماتوا عيالك مـن الجـوع

(( كنّا وكنّا ))

فيما مضى كنّا على الأرض حكام=ترضخ لنا كل الدول والشعوبي
من حد (صنعاء) لين بوابة ( الشام)=ومن ( طنجة) ( لماليزيا) في الجنوبي
على (جبل طارق) لنا عروش وأعلام=وعلى( بلاد السند ) حاكم ولوبي
كان (الرشيد) يخاطب السحب : " قدام...=صبّي وياتيني خراج الصبوبي
كنا دعاة الرحمة ووصل الأرحام=وبعد الله الملجا لشاكي الكروبي
كنا صناديد الشجاعة والإقدام=تشهد لنا ساحات غبر الحروبي
كنا وكنا وانتهت ذيك الأيام=صارت لنا مثل السراب الكذوبي
صمّ الجبال الراسخة راحت احطام=يهزّها حتى نسيم الهبوبي
اليوم في ظل احتلالات الأقزام=عشنا المذلة واختلاف القلوبي
نصبح على دمع الثكالى والأيتام=ونمسي على العرض الشريف امغصوبي
والمشكلة ماعاد لجروحنا آلام=ماتت مشاعرنا بكثر الخطوبي
بعد تهاونّا بتعاليم الإسلام=شمس المعزة حوّلت للغروبي

(( رسالة مختصرة إلى شيخ مزيف ))

ياشيخ أو ياللي يسمونك الشيخ=عن شيختك ياشيخهم مادرينا
مدري من الهندوس وألا من السيخ=بس الوكاد أنك غريبٍ علينا
لنتب من اللي يصنعون الصواريخ=ولنتب ياابن الأجواد منا وفينا
ياجاهلٍ قدر العرب والتواريخ=لاتجهل فنجهل على الجاهلينا
بأفعالنا نسقي العدا سم زرنيخ=ونقلط الصاحب لسمن وسمينا
من هان نفسه ذاق حسرة وتوبيخ=ومن شاف نفسه هانه العاقلينا
خلك وسط واترك طريق المفاضيخ=شفهم يسار الخط متقلبينا
مانحترم غير الرجال المطانيخ=كسابة النوماس دنياً ودينا
ومانحتقر غير الخفافيش والذيخ=قناصة الفيران في ( برّ سيناء)
ناسٍ من ثياب المروة مفاصيخ=الله يعافيهم ولايبتلينا

قبل عامين حصلت على بعثة لأمريكا وتركتها وأنصح إخواني المبتعثين بالبحث
عن بديل وهو متوفر بكثرة ولله الحمد :

ياابوجزاء تقدر تشاهد جوازي=تأشيرة أمريكا عليه امختومه
بعثة دراسية من أحدث طرازي=أخذتها والله يعز الحكومة
وبكامل الرغبة وكل اعتزازي=عرّضتها صفق الرياح الصرومة
ماطاعني ساقي على أرض المخازي=محاربة الإسلام وأكبر اخصومه
رزقٍ وراها ماعليه اعتيازي=لو متّنا من الجوع مارحت أسومه
مانيب لاتاجر ولابرجوازي=لاشك نفسي كل عزٍ ترومه
ضاريٍ على قنص السمان الجوازي=ماهمني حر الزمان وسمومه
من يطلب العليا وروس النوازي=لاترتخي عند الشدايد اعزومه
الله خلق حرٍ وبومٍ وبازي=والفرق شاسع بين حرٍ وبومه

قصيدة كتبتها مع بداية أحداث التفجير في المملكة
و خلطت فيها الجد بالمزح لتلطيف الجو في هذا الموضوع الحساس :

حبّ الوطن لأهل الجيوب المليّـة=أهل اللكاسز والفلـل والملاييـن
أما الذي مثلـي افلوسـه رديّـة=مستويةٍ عنده ولوعاش في الصين
أقوله أمـزح قبـل تنـوون نيّـة=يافرقة ( عليشة ) صعوط المجانيين
أنا سعودي وأفتخر بالهوية=ولافيه مثل(المملكة)فـي البلاديـن
مهبط وحي وبلاد خيـر البريّـة=(الأمين ابوالقاسم)شفيع المصلّين
وموطن هل التوحيـد والحنبليّـة=يكفيك(ابن باز الحبر والعثيميـن)
الله عطى(آل سعود)حبّ الرعيّـة=وإنّا نبايعهم على العسـر والليـن
مانستمع(سعـد الفقيّه)وخويّـه=الحاقد الأهوج عديم المضاميـن
لوعندهـم للديـن خيـر وحميّـة=ماإستوطنوا(لندن) بحضن المعادين
نخشى الوعيد بميتـة الجاهليّـة=لونخلع البيعة ونجفى السلاطيـن
وإن شفتنا بعض الأمـور الدنيّـة=لاقايلـن زيـنٍ ولاقايلـن شيـن
قد شفت ( أبومتعب) على (العربية)=يقول ويصرّح بروس العناوين :
بأضرب بكفٍّ من حديـدٍ عتيّة=على الذي مايلتزم بالقوانيين
لذلك بنسكت على مكرهية=العافية زينة ولنّاب عجلين
وقصة هل الإرهاب قصـة خفيّـة=فيها جوانب غامضـة للفهيميـن
بسّ الأكيد إنهـا جريمـة قويّـة=ترويـع للآمـن وقتـل البريّيـن
أحيان أظنّ اللي حـدث مسرحيّـة=بشاعته فاقـت خيـال الكثيريـن
شباب في عمر الزهـور النديّـة=راحوا ضحيّة للغلـو والشياطيـن
بالرغم من ذلـك تراهـا خطيّـة:=نقطع لهم بالنار هجسٍ وتخميـن
فتوى هل العلـم بخطاهـم جليّـة=قالوا خوارج والخوارج مسلميـن
تجريمهم واجـب عليـك وعليّـه=وتكفيرهم يحتاج رأي الخبيريـن
رأي المشايخ فاهميـن القضيّـة=هم قادة الأمّـة بشتّـى المياديـن
الله يحفظ الدار مـن كـل سيّـة=من بوش وإجنود اليهود الملاعين
والله يـردّ القـدس والقادسـيّـة=وترجع لنا البصرة وترجع فلسطين

يقول الرسول صلى الله عليه وسلم : (( ‏ ‏من أصبح منكم آمنا في ‏ ‏سربه
‏ ‏معافى في بدنه عنده قوت يومه فكأنما ‏ ‏حيزت ‏ ‏له الدنيا بحذافيرها ))
قصيدة حول هذا المعنى :

أحدٍ إقصوره فـي شمـال (العليّـا)=وأحدٍ (بمنفوحة ) خذا غرفتينـي
وأحـدٍ مصيفـه في العطل (ماربـيّـا)=وأحدٍ مصيفه بين طعسٍ وطيني
وأحدٍ معـه فكسـار وارد (إدبيّـا)=وأحـدٍ (كـورلاّ ) خبّطـت مرتيـنـي
وأنـا وربٍّ باعـث أحـمـد نبـيّـا=مـاوالله أحسدهـم وعقلـي رزينـي
بالعكـس يحزنّـي عُصاةٍ تفـيّـا=فـي وارف ظـلال النعـم فاسقينـي
مايشكـرون الله عظـيـم العطـيّـا=اللـي وهبهـم كـلّ شـيٍّ حسينـي
المسعد اللـي يملـك المـال وأيّـا..=أفعالٍ تنومس وديـنٍ متيـنـي
ينفق مثـل عثمـان سمـح المحيّـا=وأبوبكـر عـون الكهـل والجنينـي
وإن جـاوه الضيفـان رحّـب وهيّـا=أقـل مايلقـون كـبـشٍ سميـنـي
أمـا الـذي قصـره ينـوش الثريّـا=وهو على نفسـه مـن المجرمينـي
هذا يسمّـى خبـل مابـه إغبـيّـا=مفروض يرمى في المصحّه سجينـي
قلته وأنـا اللـي قانـع بكـلّ شيّـا=وكنز القناعة أشهد أنه ثمينـي
لاصار عنـدي قـوت يومـي إمهيّـا=وجسمـي إمعافـا والأهـل وامنينـي
كنـي ملكـت الكـون كلـه إهنـيّـا=مـن دار بوش ايلين دار الخمينـي
ليـه الطمـع فـي رزق هـذا وذيّـا=وهــذا وذيّــا كلهم راحليني
ويبقى مـن الأعمـال حسـنٍ وسيّـا=وصحايـفٍ تعطـى يسـار ويمينـي
فـيالله بالتثبيـت (مادمـتُ حـيّـا)=وإن متّ عفوك ياأرحـم الراحمينـي