بسم الله الرحمن الرحيم
هذه السالفه جرت لعمران البجيدي ( عمران العدواني ) وهو من البجايده من عنزه ...
وكان له ولد يقاله (ساير) وكان توه شاب واذا سرحت أبلهم كان يسرح معها جنب الين تاصل مع ابل القبيله ...
وفي يوم من الايام جاء واحدً قوماني يبي عسى شئ يتهياله من البل عشان يحوفه ويوم قرب من الالل وهو ينطحه ساير ويجي بينهم رمي وتصيب طلقه في ساير ويطيح مقتول ...
ويقوم هالحايف يبي يزبن للبيوت يشوفها مد النظر والرجاجيل يلحقونه وهو مايقدر ينحاش
لانه وسط ديار عنزه ويبي يزبن زبنه ويوم قرب من البيوت وهو اللى ينصى اكبر بيت بينهم
ويجي راكض والرجاجيل من وراه ويوم قرب وهو يحذف عمره حذف على البيت ويقول :
دخيل دخيل يا رجل قال عمران دخلت . ( الرجال زبن بيت ابو المقتول ساير ) والرجاجيل من وراه فقالوا: ياعمران ذابحن ولدك ساير .
وقتها أنفجع عمران فهذه مصيبه لانه زبّن الرجال يوم جاه زابن والثانيه انه قتل ابنه فقعد شوي وهو منّزل راسه بالخد ويتماسك عمره ثم قال: الرجال دخل وساير مثله مثل ساير الناس روحوا وخلوه .
ويقعد شوي الا هذه ام ساير جات تمشى مفجوعه وتقرب حتى وصلت للدخيل
ويقوم عمران ويجي وياقف بينها وبين الدخيل خايف انها مغبيهً لها جنبيه والا شئ وتذبح الدخيل فتصير مصيبه وتسود وجهه
وقال : وش عندتس يامره وهي ساكته مفجوعه وكررها عليها ثلاث مرات فقالت هألابيات :
الحمد للباري صدوق المخايل = اللى بلاني بالليالي بلاء ايوب
مايستوي لك يارفيع الحمايل = ذبحت دخيل البيت عيبً وعذروب
أدخل دخيل البيت لو كان عايل = عفواً عن المحروج حقً وماجوب
تكسب بها ناموس بين القبايل = وماراح يخلف والذي صار مكتوب
والطيب حبله بين الاجواد طايل = ولايستوي طيبً من الصبر مسلوب
مار خله دخيل ياذعار السلايل = لو كان لبني مهجه القلب مطلوب
الله أكبر فهنا صارت ام ساير موقفه اقوى من موقف عمران ( ابو ساير ) والابيات اللى قالتها تدل على حكمه هذه المراءه وموقفها اللى قد لايقفه بعض الرجال.
وسلامتـــكم
من سوالف الراويه فواز ابن غســلان