القصيده معناها فيها
قال من جهز مقاليع الضروس=للغيورواللحقود واللبلوس
اسمعو قول ابن مهدي يوم قال=وردت الفكار تشعاها الهجوس
وردت الفكار من بين الضلوع=ياهل الامثال دقن الجروس
دقت الاجراس يالله يامعين=استجيرك من بلا وقتن نحوس
يالله المعبود خلاق الوجود=ياكريمن عالمن غيب النفوس
عالمن باللي يصير ومايصير=كل شين صار عكروز امهروس
صغتها والبعض عنهاعارفين=امتحن بعض الرجاجيل الهدوس
اتجسس بعض الازوال الرخوم=من طلوع الشمس لاوقت الغلوس
لين بان النور من بين الظلام=وتضح لي حس من بين الحسوس
حس من لاحس له بين الرجال=وكل خبثن في الخبيثين امغروس
قالو الواشين في العالم كثير=كل منهم صار لذراعه لحوس
قلت خلو كل شاقي في شقاه=وسمعوا ماقلت يالربع الرموس
قلتها با سوس ناسن دون ناس=وتضحلي بالسياسه من يسوس
التجارب تكشف اسرار العباد=ينعرف من كان في سره انخوس
وبتديت اقول وشرح للحلول=مقصدي قولن سمعته من مدوس
ونتويت اخوض غبات البحور=فوق طرادن بركابه غطوس
ان رفع صدره خطير انه يطير=ون نزل غطتني اموجن كدوس
حاذفن بلدي وخيطي للحداق=لين صدت الدغس من بين الدغوس
ابغي الجرجور والنهم الكبير=مابغي الزمرور كله واللسوس
ابغي الي صدت بالدريه لبوط=ان لبط او ما لبط ماله نكوس
ونقلب رجال شيطانن مريد=فرم يفرم ماحصله من سبوس
بانصح العقال وفحول الرجال=ابعدو عن كل نادوسن ندوس
ابعدو عنه ومن مثله بعيد=كل نمامن له السودا لبوس
وكل راعي ضحك في وجه الصديق=ون توارا عنه كالعقرب لعوس
ينقل الاسرار عجل بالمغار=في اذاني بعض خلق الله هموس
المداجي والمفاجي بالعلوم=ناقلن حتفه على كتفه احلوس
ينسمع صوته وفعله مايبين=صوت خادم خادم الساق الملوس
ذا وموضوع المثايل والرموز=تلعب الشطرنج من بين الجلوس
ياهل الامثال وافين الخصال=سمها خافي وظاهرها وروس
يوم شاع القول يارباب العقول=قال بعض الناس ذا قولن حسوس
قلت خلك عن لظا الصالي بعيد=لاتعرض لنتقادن من افعوس
ياهل الامثال مافيها مجال=ويش نفعل بالصوص وبالهيوس
طال صبري ونتهى صبرن طويل=عشت في وقت المجامل والتعوس
ليت بعض الناس يفهم مايقول=قبل اقول انه لماقاله يحوس
قلتها وخص ناسن دون ناس=ماتعرض للمطاليق الحبوس
الف نعمن بالرجال اهل اكمال=اتجنبهم وخص ابها الهيوس
وين حامد وبن حوبان الهمام=اسمعو ماقلت في حرب البسوس
ناوين حربن طويله يارجال=لين ادرس بعض الازوال الدروس
يالله المعبود يامنجي الخليل=ابعد النمام والنذل الدسوس
ياردي الحظ وش لك بالكلام =في قفى الاجواد كنك حد موس
واجدن مثلك وخلانك كثير=ماعرفنا من نزوجه العروس
انت ولا ذاك ولا قول ذاك=ونت قولك مالقيناله اجنوس
قلت قولن مايوافق للعقول=كل ماقلته من القول امعفوس
عارفن قصدك وهذا مستحيل=خل عنك الزيف ورسال الفكوس
لاتمنا للعلوم الطايلات=كل مرؤسن خبيثن مايروس
خل عنك القول وسمع مانقول=لاتمعمع مثل معماع التيوس
تدعي بالعقل لاكن امهبول=كل شين تدعي به فيه سوس
ياهل الامثال وافين الخصال=لاحدن يسمع كلام العيدروس
القليل اقدمه قبل الكثير=ون بغيت الزود حملنا البقوس
كان شاعر تدعي بالشعر هات=مس حبل الجد وناله مسوس
وسمع الامثال لاطال المجال=هات ماعندك قبل يومن عبوس
ذاك يومن يظهر العلم الصحيح=والشمال اتهب وتهز الغروس
والجنوب اتهب والنكبا جميع=لين ما تبقى على الارض الطعوس
كان هبت ينفتح للقول باب=قبل هذا اليوم والشعر امحبوس
وفرت الامثال من سجنن رهيب=وقتفاها كل شيطانن بهوس
والشياطين اقلبت من كل صوب=كل شيطانن معه للروس فوس
تضرب اهل الزور والنذل الفجور=لين يصبح من عمى عينه يكوس
من تعرضها تعرض للوبال=عندها له سم صافي وسط كوس
ياهل المعروف كلن امعروف=اتجنبكم وخص ابها النجوس
ذا كلامي ونتظر رد الجواب=كيف زرت الدار يالنيرب جسوس
هاك يالنيرب من القايل جزاك=لالفاك الشكم خلك له لموس
قبل عجن ثار منهد الجدار=ونهدم مبناك بعده ياجفوس
بنشد المقصود عن دار الجدود=وين توقع فيه والاسم امخفوس
تدعي انك جيت من ذيك الديار=وفد يثرب لابسن درعن وطوس
كان تلبس درع قدامك شجاع=ضربته منها الذي مثلك فطوس
خل موضوع الدروع اللي تروع=لاتلوس في علومك لاتلوس
مالفيت الدار من ذيك الديار=لا ولالك ساس فيها من اسوس
اثبت اللي تدعي به في نباك=خزرجي ولا تقول انا من اوس
بدرس التاريخ وعرف الصحيح=ون تغير قلت في قولك ادنوس
مالفيت الدارهذي للمزار=جيت مرسال النمايم ياطفوس
ذا وانا والله ماعرف الدروب=بنشدك من وين دربك يارفوس
جيت من بغداد ولاحضرموت=او سعودي جيت من بيدا يبوس
اوكويتي جيت منذيك الديار=تل ابيب ارسلك قدام العسوس
او بلاد ايران لك فيهامقام=او مجوسي جيت من دار المجوس
ويش حدك ويش حدك يارزيل=كان قبل القول تنظر للعكوس
تنتظر في عاقبة قولك عليك=ياابيل أهل الكنيسه في طقوس
بالعصبصب جاك قولن من فهيم=عارفن مصب صبه في الخروس
الجرايم ما تغطيها الغيوم=لو جرت في الضل بانت في الشموس
الحذر ماحل من دون القدر=جند ابن داوود للنمله دعوس
قالها اللي للنواويه يقول=تنطلق في حرب غبراء والدحوس
جاك من فاجاك ورسل لك جزاك=صاعقت الامثال بالضربه شورس
المحاجي والملاجي والجبال=لا ولا ينجيك درع ولا تروس
ما بغيت القول هذا يارجال=حدني للقول مخراق العروس
ونفجر بركان صدري من جديد=وسقت جند الحرب مافيهم قعوس
كان شاعر رد ولا فستعين=شوف من ينجيك من حربن ضروس
كان جد الجد لجموع الجميع=لاتعود من لقا الغاره نسوس
ذا ونرجع بالمثايل للقروم=ونتظر للرد واضح في الطروس
انتظر للرد من وفد الكويت=أو شباب الدار والذيب الفروس
مقصدي فالح لاقصدي سواه=يابومبارك رد وحذر لاتدوس
كان ابن عجلان عجل بالردود=نشكره ونزوجه عذا عنوس
هي عنوس الشعر للشاعر طموح=مهرها الامثال ماتبغى الفلوس
يابو مبارك ياعمى عين الضديد=شوف ما تشوفه والأو لا لسوس
والعفو مطلوب من كل الجميع=لاحدن منكم علي يصبح حموس
ردو الامثال هذي يارجال=وكل رجالن لما يلبس يقوس
وحسبو لحساب حماي الركاب=كل رجلن دون حدانه حروس
ضيف قولي له كرامه يارجال=عندنا له هيل والبن امحموس
ياهل العيرات من دارن بعيد=وردو هداج عن ودر الرسوس
ونشدو بعض الرجال امن الرجال=كل روسن فوقها للطيب روس
قلتها وأقول كل ماجالي مجال=ماتعذر كل نمام وبلوس
للشاعر الكبير / ناصر بن مهدي الدوسري (يرحمه الله)
والمعذره إذا وجدت بعض الاخطاء الأملائيه
وتقبلوا خالص ودي