قصيده للشاعر شلعان بن ظافر الودعاني
الله يرحمه ويسكنه الجنه
عفا الله عن عين يزيد عناها = ويفيض من بين البريمين ماها
ولا تفضي بالنعاس اجفونها = من هاجس بالليل يركض وراها
لانام خال البال قامت تحوفني = هواجس جور الليالي دعاها
تقبل وتقفي كفى الله شرها = مثل السباع اللي تدور عشاها
دنيت انا القرطاس واشرت بالقلم = بسجلةٍ يطرب لها من قراها
فيها نظمت القاف مما طرالي = ومن الروى والعايبات حماها
مثايل تطري على البال كنها = صافي الجواهر على مشتراها
اصونها بفنونها ثم لأقولها = والناس تعرف طيبها من رداها
او ما شاعر بالكون جاله قصيده = الا نقاد العرب من وراها
اما خذوا الرجال منها الفوايد = والا بصندوق الزباله رماها
واقول من نيران قلبه تسوقه = وتقلب الدنيا بلاها وراها
تكبر وتصغر بالضماير جروحي = ويزيد من بين الضلوع سناها
دنيا الغرور مضيعه كل جاهل = ما هوب فاهم وش عواقب عطاها
إلى عطت عامين فلعام الاخر = غيرك غداها وانت وجبة عشاها
عكف مخالبها جداد سنونها = تجيك غضبانه طوال خطاها
كم دمرت ما عمرت من مباني = على جميع الخلق تومي عصاها
غدارهٍ خوانهٍ جوارهٍ = مثل الرحى بالناس يطحن جماها
حمر مضاربها وساعٍ طعونها = قضاعةٍ تمشي على ما طراها
ان اقبلت احسب حساب إقفايها = لابد ما تعطيك يومٍ قفاها
من يامن الدنيا وهذا فعلها = مجنون من يامن عواقب رداها
لاتموت يا مسكين وانت مغفل = قدم لنفسك قبل ياتي قضاها
لك يوم ما ينفعك مالٍ ولا ولد = والنفس من دنياك خاب رجاها
عزلت منها عارياً ومفصخ = والكاتب انهى والسجله طواها
تروح باعمالك وحظك ينالك = لاعمدت الابصار صوب سماها
تشوف ما عملت في حياتك = قدام عينك كشف منها غطاها
يا غافل إدر ان ما على الله خافي = جميع خملاتك ترى الله يراها
إذكر عذاب الله وارحم نفسك = واصبر ورد النفس عن هواها
تراك في دنياك مثل الوداعه = ووداعة الله لابغاها خذاها
هذا وقبل اشيب القاف عندي = نصيحه للناس يصرخ نداها
الاوله منع النفس من الهوى = ترى هوى الشيطان من هواها
والثانيه دينك ينور جبينك = وأد الفروض الخمس واحسن اداها
والثالثه بالوالدين مروفه = واعرف جمايلهم ولا تنساها
ترى عليك لوالدينك واجب = وترى رضا الرحمن من رضاها
امك بزتك وشالتك في بطنها = باسالك انا بالله ويش جزاها
وسلامتكم