السلام عليكم رحمة الله وبركاته
أخواني الأعضاء هذه قصيده جديده من قصائدي
المتواضعة التي أتمنى أن تحوز ولو على القدر اليسير من رضاكم واستحسانكم
وأن تكون في مستوى تطلعاتكم لكم القصيده ولي الشرف بإطلاعكم عليها
إلا متى أتحمل ذنوب غيري = وأصير بعيون البشر ميت أحساس
وإلا متى بعيون غيري تصيري = مظلومة وقلبك رهيفٍ وحساس
خلاص أنا قررت أحسم مصيري = وأفضحك وأظهر ماتخفى على الناس
أهم شي إني أريح ضميري = حتى ولو أخسرك عادي ولا باس
منتي كفو قلبي ولا صيد طيري = خسارتك مكسب ومكسبك إفلاس
روحي وخليني بشري وخيري = ماعادلك في دنيتي اليوم مجلاس
مايلتقي سيرك على خط سيري = دامك سمعتيبي عذولٍ ودساس
كفي دموعك لا تهلي العبيري = ماينفعك والراس وقّع بها الفاس
ولا ترتجي قلبي فقلبي شويري = والله لأجزه لو عصاني من الساس
يحرم عليك توردي الماء فبيري = والله لو أن عروقك الخظر يباس
وإن كان قصدك تخضعي الراس طيري = عجزوا طوال اشناب ما وطوا الراس
من بعد ما كنتي شهيقي وزفيري = صرتي على صدري جبل يقطع أنفاس
ومن بعد ما كنتي زهوري وعبيري = أصبحتي شوك ٍ حدها حد الأمواس
كنتي لي الفيّة وصرتي هجيري = كنتي لي أفراحٍ وصرتي لي أتعاس
وش جلسك للحين يابنت سيري = مالك أمل في رجعتي أقطعي الياس
تجبري وأرجي العوض وأستخيري = ويمكن تلاقي شخص غيري من الناس
بس آتحدى لو تلاقين غيري = يحمل ربع ما أحمله من حب وإحساس
وسلامتكم
اخوكم
عبد الرحمن سعد الدوسري
حزين الحرف