السلام عليكم ورحمة الله وبركاته ،،
أقدم لكم قصائد للشاعر/ ناصر بن دهيم الغييثي الدوسري
يامرحبا باللـي يشـرف قدومـه=مفرح الضمني له انزف الافـراح
من لامني فـي حبـه الله يلومـه=الشاعر اللي كنـه البـرق لا لاح
كن القوافي في يديـه امحكومـه=عزيز نفـس وللنواميـس مـداح
يامـادح كحيـلان هـذا لزومـه=في خدمة اللي مثل شرواك ماشاح
لجل الوطن يبذل وتقوى عزومـه=كسب النعم تسوى ملايين الارباح
الطيب بين اهل الوفا الله يدومـه=ومثلك يابو فيصل به الطيب ماراح
امعرب الجـدان وامطيـر قومـه=خيالهم يقبل على المـوت نطّـاح
يوم الزمن قاسي وزادت سمومـه=افعالهم تشهد لها علـط الارمـاح
من حط حمران النواظر خصومـه=ماله مع اهل العز قيمه الى طـاح
كل الشكر للـي يشـرف قدومـه=مفرح الضمني له انزف الافـراح
الصبح شعشع واقبل النور ب النور=والليل الاسود مايجيـب الصراحـه
ماني بضايق لكن القلـب مقهـور=مثلي تساوت ضيقتـه وإنشراحـه
آمنت باللي ثبّت اطويـق والطـور=عساه يلهمنـي ثبـوت وفصاحـه
واضح واحب اقابل الناس مسرور=مخلوق من بين الرضا والسماحـه
اكتب قصيدي همي إسعاد جمهـور=ماهمني فوضه وصـوره وساحـه
موجٍ تلاطم من ورى سبعة ابحور=حروف شعـري للمخاليـق راحـه
يامبتليني ؟ بالحكي اسمع الشـور=لا تحسبنّك عايش بوسـط واحـه
اللي خلقنا ميّـز الحـق والـزور=الفرق واضح كالسمـا والبراحـه
الطب يبغاله مـن النـاس دكتـور=والهندسه تبغى ارتفـاع ومساحـه
ياللي تقول اني من الناس مغـرور=ميّز همـاج المـا وميّـز قراحـه
لامن كبر راسي مع الطيش معذور=لكن غرور الشخص سبة مطاحـه
نسعى ب هالدنيا نبي الحال مستور=والمجتهـد همـه وغمـه نجاحـه
ياصاحبي ؟ لا تقعد اتلّف واتـدور=الطير وشهو ؟ لو كسرنـا جناحـه
منت بمعي يابن الاجاويد مجبـور=من راح مني سمّـح الله مراحـه
ودك من الدنيـا تعيـش وخاطـرك ماهوعليـل=لا ارتـاح بالـك ماغبطـت النـاس والاّ مالهـا
ودك كلام النـاس قـول الحـق بالشـي القليـل=وعند العرب ماغاب كلمـة حـق واللـي قالهـا
وانا تحلويـت القصايـد حـزةٍ مـن كـل ليـل=لا جاتني انسى هلـي وانسـى البشـر وابقالهـا
يوم القوافـي تتجـه كنهـا كمـا سيـلٍ يسيـل=حلفت مـا عـوّد ورى مـادام صـرت اقبالهـا
بنـات فكـري لا حصـل بالسالفـه قـالٍ وقيـل=جنّـي وانــا هذبتـهـا ولبستـهـا موالـهـا
ومحلا شبوب النار والدله علـى جمـر المليـل=رسلان صفرا مزعفـره والهيـل هـو يعبالهـا
في يّد قـرمٍ لا عتـزا راغـة عيونـك يالذليـل=خفيـف جانـب دلـتـه مايشبـعـك فنجالـهـا
اسري وآسري هاجسـي كنـي عشيـقٍ لرحيـل=والليـل لامنـه سـرى الالغـاز ؟ مـن حلالهـا
وآسج فكري في البحر ميـلٍ بعـد ميـلٍ وميـل=وامـر بأمـواجٍ تلاطـم ينهبـل مـن جالـهـا
كنـي غريـبٍ ضيّـع دروبـه ولا فيـده دليـل=اعمـى بصـر والا البصيـره ميزتـه بلحالهـا
وين الفهيم ابن الحمايل صاحب الهـرج الجزيـل=يفهم معي كلمـة عتـب والنفـس مـن علالهـا
اخاوي الطيّب ولا لي في الردي قسـم وحصيـل=ومقـرد الخلـق آتعـوذ مـن غـثـا جهالـهـا
وانزه النفس العزيـزه فـي سمـا جـوٍ عليـل=والحر لشقـر لا كفـخ وكـره بـروس جبالهـا
بشكي على اهل العرف واهل الحق من واقع هزيل=مشاكـلٍ مـن كـل صـوب وحالـةٍ يرثالـهـا
قلبت درج الطاولـه ولعّـت فـي نـاري فتيـل=ونـارٍ تشعلـل بالسـواد اشحاجتـي بشعالـهـا
شبوهـا بياعـة ضمايرهـم وجحـادة جمـيـل=باعوا امم لاجـل المصالـح قصّـر الله حبالهـا
ولو جاتك الحيّـه تهـز الـراس تتمايـل بذيـل=ماظنها ترقص طـرب والسـم يسـري بحالهـا
عرب نعم حنـا عـرب احـرار يزبنـا الدخيـل=اطهر واشـرف امـة تسمـو بفعـل الرجالهـا
عرب يشوفـون الجبـال بعينهـم حبـات هيـل=وشافوا النجوم انفوسهم هيهـات مـن يرقالهـا
عرب تعلـو واعتلـو ثـم اعدلـو دربٍ يميـل=الحـق مبـدأ بينهـم والصـدق رمـز اقولهـا
عـرب طلـع منهـم نبـي الله يهـدي بالدليـل=الهاشمـي المصطفـى زال المنـاكـر زالـهـا
عمر وابو بكر وصلاح وخالـد السيـف السليـل=اهنا العرب يوم العـرب تفخـر بأفعـل ابطالهـا
الله وكبـر صـارت امجـاد الله عابـر سبـيـل=ذكرى تسطر مجدهـا صعـب الزمـن يشتالهـا
كنا ثلاث حروف ؟ صـارن كالخيـال المستحيـل=واليـوم صرنـا عالـةٍ بيـن الامـم واحوالهـا
ياجيل ياجيل الزمن اصحـى ونافـس كـل جيـل=وقلهـا وقـل ان الامـم تزهـا بكفـاح اجيالهـا
عسى ونرجع للكتاب ويرجـع السيـف الصقيـل=والسيـف وطـى روس كانـت بالسمـا لذيالهـا
ويالله تعـز شيوخـنـا يالله يالـظـل الظلـيـل=اللـي علينـا فضلهـم اسـودهـا واشبالـهـا
وانا قلبـت الطاولـه وريتهـا صاحـي وهبيـل=يـوم المهبـل غارقـه فـي نومهـا ومقايالهـا
الارض جفـت يــوم وقّــف مطـرهـا=والشيّ لامن فـات ماينفـع الصـوت
سهيـت لحـظـه هـايـمٍ فــي نحـرهـا=كنت احسب انه حلم ياناس ويفوت
فــي ليـلـةٍ ماينـعـرف مــن قـمـرهـا=جتني حياتي ليـن حسيـت بالمـوت
لبـا العيـون الـلـي خـذانـي نظـرهـا=وفديت خشتهـا مـن التـوت للتـوت
موسوعةٍ في الحب جيت اختصرها=لقيـت عـدوان الغـلا وسـط تـابـوت
عوبـا وكـن العيـن تخشـى خطرهـا=ان عمّـرت بيتيـن تهـدم لهـا بيـوت
ماجـيـت اعلمـهـا الـغـلا وانتظـرهـا=فرصه ويلقاها من النـاس مبخـوت
ان كانـهـا الميـنـا تـرانــي بـحـرهـا=أشواقـي المـحـار واحـيـان يـاقـوت
ليت الهبـوب اللـي تلاعـب شعرهـا=تجعل غلاها بين الاضـلاع منحـوت
قمـت آتكاثـر شوقـي اللـي غمـرهـا=أحبـهـا مـــرات واشـوتـهـا شـــوت
غيـري رحبهـا ميـر قلبـي خسـرهـا=نزَعْت باقيها مثل مـا انْـزع الكـوت
عـوّدت رجلـي مـا تطـالع اثـرهـا=والنـاس يشبعهـا قليـلٍ مـن القـوت
قصيدتـي طـالـت وهـذا قـدرهــا=راحــت وانــا والله احبهـا مـوت
وسلامتكم ،، مع خالص التحية و الاحترام.