[معلومات العضو عبدالرحمن الشرافي]

(( هــذه الـــمــشاركـــه خاصه بــمـنــتـدى قــبـيــلة الـــــدواســـر ))




أخواني ,,,,


منسوبي المنتدى الرسمي لقبيلة الدواسر ..

أسعد الله أوقاتكم بكل خير ,,


هذه قصيدة للشاعر/ ماجد بن عيسى بن خفران المسعري الدوسري

فـــ الأمير / مــران بـن قــــــــويـــــد (( حـــفــــظـــه اللـــــــه ))


يقول فيها :

بديت بأسم المعتلي عالي الشان = بأسم الأله أبدي بقولٍ ونيه
وأقول قول الصدق والصدق عنوان = ومن لا هرج بالصدق قوله خطيه
وأعطي على قولي وثايق وبرهان = منطق لساني في تصرف يديه
ومعنى تماثيلي مدايح كحيلان = أميرنا بن قويد زبن الونيه
مران لا عدّو طويليين الأيمان = عدوه الأول بالوفاء والحميه
والطيب والطولات والعز مران = وعسى حياته بالمعزه مديه
اللي ليا كبرت مواجيبها بان = يكمل مواجيب الرجل الوفيه
لا كبرت القالات ينهظ بلي هان = ينقل علوم(ن) ثقل قار الطميه
عزام جزامٍ على كل ميدان = وحكيم راي ولا يبي له وصيه
زحزيح حلحيلٍ حكيمٍ وفهمان = ودليل شور وكلمته واقعيه
لهل الكرم ما جاء على درب نقصان = كفه بـماجوب النشاما صخيه
يمناه هيف لقرح النوب والظان = وناره على كل المواجيب حيه
وله مجلسٍ بالكيف ودلال رسلان = والعود الأزرق والعلوم الطريه
ينصونه العربان حضرٍ وبدوان = ويفعل علوم الطيب صبح وعشيه
مران راع الطايله طير حوران = سيف الوفاء قايد لواء الزايديه
شيخٍ على شيخٍ ومن روس شيخان = شيوخ ال زايد من على الجاهليه
للسلم عراف وللحرب فرسان = وطولاتهم في كل موقف وهيه
نفخر بهم حاضر ومن ماض الأزمان = وحنا لهم مثل الجبال الرسيه
حنا ال زايد يوم زوغات الأذهان = يوم المناحر والعلوم القصيه
يوم ان لهل الخيل الجيش عتنان = وكلٍ يهوش ويعتزي في ذويه
نقلط بعزم وجزم بسنان وعنان = ونسخر سلاطين الرجال العطيه
هداتنا يشبع بها الذيب سرحان = وصولاتنا في كل دربٍ جريه
وحنا سوات طويق للضيق مزبان = ضلعٍ على العليا ركونه ذريه
فينا المراجل بالوفا شانها شان = كرم وطيب ونخوتن يعربيه
قصيرنا غصبن على كل عدوان = ناسم عصاه ولا تجيه الزريه
وخوينا محشوم لو كان ما كان = رجالنا يحمى مواقف خويه
وترعا رعاين الخطر جهر واعلان = ترعا زماليق القفر ومّحميه
نرع بها الزملوق من وين ما زان = ومعها جنبها ما تخاف الرزيه
اما مجاهيمٍ مصاريح ديمان = وجت عندنا يوم اشتعال الوريه
جت عندنا سودٍ سحاجيج و زيان = ومن دونها ننحى الجموع الدهيه
مثل الحلال السود لا جتك الأضعان = روع الحريب من اين ما أنوى نويه
والا مغاتيرٍ مثل غر الأمزان = وضحٍ مثل غر المزون النشيه
فيها صعاطيرٍ على الصوت وأجنان = لا روحت تقول صفت سريه
يا ما عسفنا دونها كل فسقان = ويتوق لا من ذاق حر اللضيه
هذه عوايدنا حقايق و وكدان = يوم اللقاء فــ ايامنا الأوليه
من دون قاصر فالقبايل والأبدان = كلن بفعله فيه حسنه وسيه
واليوم بين أنعام وأسلام وأمان = والحمد لله فالحياه الرخيه
وقت ٍ به العربان صحبان و أخوان = وكلن مريح وفي حيات ٍ هنيه
وأختم كلامي طيب عنبر وريحان = وهذه تراها لبو متعب هديه
هديت ٍ من راس ماجد لمران = ولا أبغي عليها يا ابو متعب جزيه
وصلاة ربي عد ما هل ودان = على رسول الله حبيبه نبيه

و سلامتكم,,,




أخوكم / عبدالرحمن الشرافي