خذاني هاجسي .. يمّ الشعـر.. ومعانـق الاوراق=وبكتب لـي قصيـده .. حبرهـا دمـي واسويهـا
وليّامن الزمن ضيّق عليّ فرحي ,, وصدري ضاق!=تناوشت القصيـد.. اللـي علـى نفسـي يهدّيهـا
لأنـي عـارفٍ شعـري يسلّينـي مـن الاعمـاق=يسوق الطرق مـن شانـي وانـا منهـو يجاريهـا
ولأني شاعرٍ.. خايف على شعره مـن الاخفـاق!!=مع ان الشخـص لـه وجهـة نظـر لازم يبدّيهـا
بلاني حظي العاثـر مطاولنـي مـن الاشـراق..=الى حتى مغيـب الشمـس فـي نفسـي يباريهـا
((عسى ان تكرهوا شيئاً وهو خيره على الاطلاق))=عبـاره دوم ارددهـا علـى نفـسـي واطرّيـهـا
يحزّ بخاطري شـيٍ علـى هـذا الزمـن مـالاق=وأشوف الناس في دنيـاي .. يامكثـر بلاويهـا!!
أنا أبغض مـن الاشخاص..رجـلٍ للحكـي لفّـاق=يلفّـق لـه حكايـا كاذبـه ويـروح يحكيـهـا!!
ورجـلٍ شايـفٍ نفسـه.. وكنـه مالـك الأرزاق=وهو (خايب)ولايسوى وطـى رجلـي واثاريهـا!!
ورجـلٍ خابرينـه فالمجالـس للحكـي سـبّـاق=هروجـه لاحكـى ماينعـرف وشهـي معانيهـا!!
ورجـلٍ فـي دروب المرجلـه ينتابـه الارهـاق=يمينـه فـي وصـول الغانمـه ماعـاد يمديهـا!!
ورجـلٍ تنفقـد عنـده مبـادي روعـة الأخـلاق=تشوف الحقد فـي وجهـه .. وبسماتـه يخفّيهـا!!
ورجلٍ يدّعي بالحق , وطبعه .. من تحـت بـوّاق=مثل ماقال بعض الناس .. ((حاميها حراميها))..!!
ورجلٍ لازهمّته.. صار عذره بالكـذب وانفـاق!!=ولاهـو قاطـع الفرجـه ولايـقـدر يعدّيـهـا!!
ورجلٍ عادته دايـم علـى حكـم المَـرَه ينسـاق=تسوقـه ويـن ماراحت..ولايـقـدر يخليـهـا!!
ورجلٍ همّل امه..فـي مرضهـا منتويهـا فـراق=بعـد ماحطّـت الآمـال فـي دنيـاه .. يرميهـا!!
ألا (ياجعلهـم فـدوه ) لمنهـو للـعـلا تــوّاق=يـروم المرجلـه.. والغانمـه يسعـى ليجنيـهـا
الشاعر الكريم : حمود بن تميم
اررررررحب ترحيبةٍ تردف مليار ترحيبه ياعشير المناعير
في البدايه ارحب فيك في هذى الصرح الكريم
واهني نفسي واهني هذى المنتدى الكريم
بأن كسب شاعرٍ متمكن مثلك جعل عمرك طويل على طاعته
وقصيده قويه قويه والى الامام عسى الله يبارك في احساسك وفكرك
وصح الله السانك وعتلا شانك وزادك الله من زوايد فضله التي لا تنقضي
قصيده جزله بما تعنيه الكلمه تقراها مرارٍ ولا تملها من سهولة معانيه
وعذب قوافيها فبارك الله فيك اخي العزيز والله يهنك في عمرك
قصيده كلها حكم ومواعظ وعبر لمن ارد العبره والعلوم الغانمه
وننتظر جديدك المميز
وتقبل تقديري واحترامي واعجابي في قوافيك الجزله
اخــــــــوك / فـــــهـــــد الــغـــريــــري,,,,,