انتحى بي هاجس الفكر يالله المستعان=هاجس(ن)لا أدوى على الفكر يبطي ما استراح
وانفتح باب القوافي وبدع القاف زان= وانجذب طاروقها لي مع الدرب السماح
وارتحلت احصان الامثال واطلقت العنان= وماكنيته في مخازن قوي السد باح
ولالي إلا أحطم الصمت خوف(ن) من الجنان = وكون احصل عقب شكواى ونس وارتياح
او يجيني فزعة تجعل الداين مدان= اونصيحة خير ويفيدني نصح الصحاح
فيا نديبي جهز الجيب وارد ذالزمان= وارد الفكسار مطلب بعيدين المراح
كامل الميزات ماهوب في عازة ضمان= ابيض من اللي يجي له على الشنطة جناح
خله ايوجه ترى لازم الموجاه حان= ونحره مطلق عريب النسب طير الفلاح
ابن عم وفي اللوازم نعده من الخوان= منوة اللي منوته يارد العد القراح
القبيلة لاد عمار والجد الحصان= لابتة(ن) يوم الوغي ما يزعزعها الصياح
لابة(ن) تارد على الموت لاهاب الجبان= والفخر عنوانها في الهجوم وفي الكفاح
واخطرك لامن لفيته على الحيل السمان=ومدخن(ن) فيه ازرق العود فوق الجمر فاح
سلمه خطي وقله سلامي باللسان= عد مابرق الوسامي بسود المزن لاح
عطه روس اقلام ومعزبك سيد الذهان= قل رفيقك في محابيل عكش الرمش طاح
واعجل برد المكاتيب لاهنت ولاهان= تدري الي ينتظر خاطره مابه فساح
قول منهو ذاق ذبحه وشافه بالعيان= وكان حر وصار في حاجة اطلاق السراح
مثل حر طاح في الفخ يوم الحظ خان=وفارق المرقاب والكفخ في الجو الفياح
وفخي السود المضاليل وهروج الحنان= والجبين اللي شعاعه كما نور الصباح
جادل مشهور بالدين واوصافه زيان= وصيت ابوه يلبسه من الفخر تاج وشاح
ماخذ القلب ومجوده عنده ارهان= وطال صمتي ماحصل لي من اسكاتي صلاح
كل ماحاولت واشفيت في عقد القران= النهايه للأسف ماتكلل بالنجاح
ومابنيته في ليال(ن) يهدمه في ثوان=رفض ابن عمه بسلم الرجال وبسلاح
وحرت بين امرين كلاتها عندي إشيان=والحلو منها كما جرعة السم الذحاح
ماتعودنا نعمد الخطاء جهر(ن) بيان= وما تعودنا على الخوف من زرق الرماح
ولابه إلا نطلب الرب يصلح كل شأن = وننتضر من مطلق الشور ولا الاقتراح
السلام عليكم ورحمة الله وبركاته
الاخ العزيز والشاعر الكبير
ابو طــــــلال " عبدالله بن مرضي الجماعين"
ابوطلال يعجز السان ان يصف روعتك في ابداعك وسلاسة منطوقك
وجميل عيباراتك وحسن ترتيبك للكلام الجزل والجزاله من طبعك
ابو طلال صح الله السانك وعتلا شانك وزادك الله من زوايد فضله على هذي الرائعه
التي تخطف الاباب وتملك القلوب وتسحر الاذهان
ابوطلال اسأل الله رب العرش العظيم ان يبارك في قلمك واحساسك..
وان يجزيك عنا خير الجزاء بما تتحفنا بهي
من قصيد له رونق من الجزاله
ابو طلال السموحه على تأخير الرد فالشاعر الي مثلك وشرواك لا بد ان نتريث قليلاً
كي نرد عليه الرد الي يليق في مقامه العالي.
وتقبل تقديري واحترامي في مقامك العالي
اخـــوك / فــهـــد الـــغـــريــــري,,,