::: مـنتدى قبيلـة الـدواسـر الـرسمي ::: - تسربل شعرها ....سعد الودعاني

السلام عليكم ورحمة الله وبركاته
سعد الودعاني
تسربل شعرها .. المسترسل .. المتساوي .. المنثور
وراحـت تجمعـه بيديـن كـن الثـلـج أصابعـهـا
كثيفٍ .. فحمـيٍ .. متمـوجٍ .. متغـذي .. معمـور
بخـوره ينتشـر لاسـال مـن شــلال مفرعـهـا
تلمـه وإيتطايـر فالهـوى وتلـف بــه وتــدور
بعـد ماحسـت انـي مـن تحـت لافـوق أطالعهـا
طوته بشالهـا .. ليـن التـوى الديجـور بالديجـور
وقّفـت بـس يمـي إحساسهـا الشفـاف رجّعـهـا
عنودٍ .. روحها من مسك .. وإلا شكلها مـن حـور
تحس أن الحسن عن وصـف بنـت الأرض طلّعهـا
تكامل وجههـا البـدري .. عبيـره بالـدلال يفـور
تشاربه النعومـه .. والعسـل والملـح مـا أشبعهـا
ربيعي الملامـح .. شـارقٍ .. مـن فتنتـه ممطـور
عليـه مـن الشفـق مسحـه وسحـرٍ مايودعـهـا
وبين رموشها .. دعـجٍ .. بـدون إيسلهمـن افتـور
وساعٍ .. خرس .. نجلٍ .. ذايبه .. حـورٍ مدامعهـا
وتوتٍ .. ضم حبات البـرد .. لـه هيئـة المسـرور
وليـا منـه تبسّـم .. كـن حـب اللـول رصّعهـا
رقيق العنق كنه لاشهر من .. ما .. الذهـب مشقـور
نجومه .. حـاول الشـال وعجـز يمنـع تناصعهـا
طليق .. أطـرق .. متنـزي .. متفـرد .. مشبـور
على شرب العطـر ماخـذ مثـل مرهـف مسامعهـا
نحرها .. أنفصخ من شمعه الأبيض .. وهو مستـور
كأنـه .. مـن ورا المخمـل تفلـت ليـن ولعـهـا
توهّج به .. مرايا .. وسطها جمـرٍ شعـق مقهـور
ووسطه .. دهن عودٍ فـاح يعكـس طيـب منبعهـا
تلامع برق .. (لبّتها) .. وحولـه غيـم مـن بلـور
وحولـه شمـس مـن ياقـوت رايـقـةٍ تلامعـهـا
بعضهـا فـي بعضهـا لاتداخـل سـال منهـا نـور
عليـه المـا .. يشـع ويفتـرق فيهـا ويجمعـهـا
بياضٍ .. في حمارٍ .. في شقارٍ .. والصـدر مـزرور
تكاشـف بيـن أزريتهـا خليـطٍ شـكـل اروعـهـا
رفيعٍ .. نابيٍ .. متشهـلٍ .. متغطـرس .. مغـرور
كأنـه لامشـت والا .. اوقفـت يمنـع تواضعـهـا
عليهـا .. فـارعٍ منـه .. ايتفتـح للنعيـم زهـور
طغت فيه الطـراوه وأسفـرت فـي طـول فارعهـا
ليـا منّـه تثنـى مايخلـي الـريـح تشـهـد زور
تعاطفهـا .. يشـاور للهـوى ويــروح يتبعـهـا
جداول من ليونـه .. تنتهيـه وتغرقـه .. وتجـور
عليـه .. وتلتـوي بـه .. لاتمايـل مـن تهزعهـا
نحيلٍ .. راويٍ .. ضامر .. دقيقٍ .. مستوي .. مفزور
نحيفٍ .. أهيـفٍ .. متفهـقٍ .. كنـه مهـو معهـا
ليا قامت تحس انـه علـى القومـه ماهـو مجبـور
وإيلا منها أجلسـت كنَـه علـى القومـه ينازعهـا
ليا منه انتصب من كثـر مايشـرب ضمـاه غـرور
تفتّالـه علـى اللـي حولـهـا بالتـيـه يرفعـهـا
وإيلا من دنّقت .. ينساب ما ورده .. إيليـن الـزور
ويبـرق خدّهـا لامـن تـدلاّ .. بـعـض برقعـهـا
مذارعها .. حريرٍ .. ناصـعٍ .. يلعـب بياضـه دور
ليا من خانها .. (الكـم) وفضـح طـارف مذارعهـا
سخافٍ .. مرهفاتٍ .. ناعمات .. إصغيـرات شبـور
ضبايبها .. شفافـه .. هبـوب الريـح .. توجعهـا
ومبروم .. ورا .. الفتحه .. شروق بالفتن مخشـور
طريٍ .. مدمـجٍ .. رنهـة كعبـه اتشـد مسامعهـا
بديع .. ماسيٍ .. ساطع .. رشيقٍ .. ممتلي .. ممهور
مابيـن الـدق والجـل اعتـدل وانــدار يانعـهـا
عليـه التـف سحـرٍ لمعتـه فيهـا النـدى مغمـور
يلـم الطـل فيـه .. وفيـه بعـض أشيـا يوزعهـا
فريده .. فارقه .. متناسقه .. فيهـا الجمـال جـذور
تناما .. واستوى فيها الحـلا مـن طيـب مرضعهـا
خياليـه .. ثقيلـه .. شاعـره .. هرجهـا غنـدور
ليـا مـن سولفـت كـن النـحـل وده يقاطعـهـا
طويله .. غانيه .. غيدا .. الكبر في راسها مذخـور
فنجها .. والترف .. والجـاه .. والتاريـخ .. دلعهـا
عليها .. هيمنة .. ماتلتفـت حتـى بشخـل الحـور
ولكـن الغـلا بيـدي .. شـوي شــوي طوّعـهـا
بعد ماعوّدت .. قلت أجلسـي .. ردت بـدون شعـور
أنــا ويــاك فيـنـا حـاجــة الله يقطـعـهـا
ليـا قفّـا حدانـا .. عـوّد بسرعـه وهـو مذعـور
وإلا مـنـا اجتمعـنـا كــل حـاجـه انتوقعـهـا
ومـدت كفّهـا! قلـت الأكيـد انـي انـا مـعـذور
واخذت الكف! قلت انتيـي .. هنـا ورده وازرعهـا
تجلّت وأهمست .. أخجلتني .. في كلمتك .. مشكـور
ومثلـك شاعـرٍ محبوبـتـه مـاهـوب يخدعـهـا
تنادمنـا الغـرام .. وشدّنـا .. رومنسـي الديكـور
وراح الليل .. مره تقول الشعـر .. ومـرّه أسمّعهـا