::: مـنتدى قبيلـة الـدواسـر الـرسمي ::: - مرثية أحمد الناصر بولده محمد

مرثية أحمد الناصر بولده محمد الله يرحمه واموات المسلمين
اسم الشاعر : احمد بن محمد بن ناصر الشايع ال موسى آل أبو زمام المساعره الدوسري
العمر : 75 عاما
عاش طوال عمره في محافظة الزلفي بدا كتابة الشعر منذ الصغر في المحافظه
و اول قصيده قالها عن محافظه ومسقط راسه الزلفي .
كما ان الشاعر خرج من عائله اهل شعر وروايات . وكان ابنه محمد شاعر مثل ابيه .
كما يلقب الشاعر بالقاب منها : العميد , والأمير
وهو يعد من أقوى الشعراء على ساحة الشعر الشعبي والمحاورة
ومن اخر الجوائز التي حصل عليها ابو محمد جائزة الامير عبد العزيز بن سعود ( السامر )
كما شارك الشاعر في عديد من الامسيات منها : شعبيه في بيروت و الدوحه والمنامه و دول الخليج العربي وبعض الدول العربيه ومناطق المملكه .
والآن اليكم المرثيه:

يا بعد نوم الليل عن حجـر عينـي =صبر على ما صار من وال الأقدار
صبرت صبر بـاح منـه الكنينـي= أضحك مع العالم وكني علـى نـار
ما غير أهوجس بين نفسي وبينـي =يعلم بها العلام فـي كـل الأسـرار
تقل اتحـرى لـي علـوم تجينـي= مع الطروش اللي يجيبون الأخبـار
فهمـت رأس العلـم مـن كلمتينـي= من يوم قالوا جـا محمـد ونصـار
تكسّـرت عقبـه جرايـد يميـنـي =عز الله اني عقب ما صار صبّـار
مـن عقبهـا ونيـت لـي ونتينـي= ونة غريب بالخلا ضـاع واحتـار
لـولا الله أبـرك ثـم قـوة يقينـي =لا طير مثل الطير من كف صقـار
تخنقنـي العبـره وأفـرّك يدينـي= واحترت مثل مصالي النار والغـار
علـم يخلـي كـل قاسـي يلينـي= كنه على قلبي رصـاص أم كـرار
الـى ذكـرت عيالـه المصغرينـي= هــذا يعزيـهـم وهــذاك زوار
احد على جنبه واحـد لـه ونينـي =جتني هموم القلب من كل الأقطـار
قلت اصبروا والله مـع الصابرينـي= الله يكافيكـم صواديـف الأشـرار
عسى عوضنـا الحـي بالميتينـي= ناصر ونايف ذخرا سـر واجهـار
وأحمد وعبـدالله ذرانـا الحصينـي= صغار سن وان بدا الـلازم كبـار
يجبر عزاي اللي بخلقـه ضمينـي= محيي العروق الميته عقب الأمطـار
مالي عن المكتوب فـوق الجبينـي= لو رحت شرق وغرب ويمين ويسار
صليت نصف الليل لـي ركعتينـي =أطلب لـه اللـي للخطيـات غفَّـار
خفف ذنوبه يـا أرحـم الراحمينـي =في ماقفٍ ما ينفعـن فيـه الأعـذار
جعله برضوانـك مـن الفايزينـي= بالماقف اللي به يضيعـن الافكـار
في ماقفٍ بـه كـل خافـي يبينـي =تمت وصلى الله على سيد الأبـرار

منقووووله
رحم الله محمد ابن الشاعر العملاق أحمد الناصر الشايع
أخوكم
محمد المسعري