في بنوك الحظ ماعندي رصيد = مفلس وحتى الحديدة بعتها .
وفي عيون الناس لي باسن شديد = لو جيوش الجن جتني رعتها .
دارعن في ثوب رجالن عنيد = معتلي والنفس ماخوعتها .
شايفن عمري مع طويق العتيد = وصورتي من كثر ما لمعتها .
صرت أصدق بان راسي من حديد = وصرت أقول ان دنيتي طوعتها .
وصرت أشوف الناس من حولي تزيد = تستمع لي كل ماجمعتها .
وصرت أنا اللي شاغل قلوب العبيد = ومالي الدنيا وأنا قنعتها
بهمهماتي قبل مابدا بالقصيد = وصفقت لي قبل ماسمعتها .
ويوم شبيت القصايد والنشيد = كل نفسن جايعة شبعتها .
وصار فـ يدي حربتن لابن الوليد = وكم فتاتن في هواها افجعتها.
مادريت الحب صرام الوريد = لين شفت اللي شبعت وجعتها .
الهنوف اللي خذت فكري بعيد = وردتني للهلاك وطعتها .
القوام الأكعبي الحس الفريد = العيون السود لاطالعتها .
تنكسر عيني وأنا طبعي جليد = وتصبح الدنيا خطاوي ضعتها .
يوم قالت لي (أحبك) ماتفيد = الأكاذيب اللي زمانن شعتها .
كنت أشوف الحب مع عذر البليد = لعبتن بإيدي وأنا شرعتها .
بس جاني الجد والعلم الأكيد = علة العشاق وتجرعتها .
قالت ان الحب قيد وقلت (قيييد) = وراودتني بقيدها وطاوعتها .
ورحت ألاعبها ولي بلعون جيد = قاضبن يدها عقب رثعتها .
وهي تضحك لي وتحلف بالمجيد = اني لأخليها تراي أجعتها .
ويوم أهلها عزمو نية شديد = كن فيني جمرتن ولعتها .
وأقفت تسير الركايب ماتحيد = وفي ذهول أقفيت ماودعتها .
يانديمي كل غصن وكل حيد = يشهد ان لي قصتن ماذعتها .
على نقا حبي على هذا الصعيد = ليتني ميت ولا ضيعتها .
دنيتي ساحة مزاد ومن يزيد = اللي معي قيمة حديدة بعتها .