الحمد لله ثبت الدين باركان = أركان خمسه ثابته مستقره
ياراكب(ن) من فوق جيب(ن) ليابان = باعطيك خط(ن) واحفظه لا تقرّه
جيب(ن) لنا في الضيق يكفخ بجنحان = موديل سته موحف(ن) فوق برَّه
هذاه جوال(ن) إذا جيت سلمان = قل له لفاك الخط ويوسف يدرّه
قوله موثق كامل دون نقصان = في مقصده كل البرايا تقرّه
حنا ترى حنا على الطيب عنوان = تاريخنا في المجد واضح مقرَّه
حنا الدواسر نذبح الحيل و الضان = حق وكرامه للرجال المسرّه
حنا الدواسر نسل من قوم عدنان = والدوسري محد(ن) من أجناب ضرَّه
نشرب فناجيل العدا سر واعلان = ومن يشبح التاريخ يلقى سـيَرَّه
بيلقى علوم(ن) قالها فلان و فلان = علم(ن) موثّق دون علم(ن) يخرّه
من لابتي بعياض مجدي بميزان = أرجح موازين العدا كل مرَّه
وحنا التغالب لابةً كلها شان = ومحد يضد التغلبي في ديرَّه
من قبل " طه " مجدنا شوف الاعيان = يوازي المرزم يوازي المجرَّه
ثم لاد زايد مجدهم مجد شجعان = محد(ن) من العدوان يامن بشرّه
أن جيتهم في الطيب في الطيب شيخان = زبَّانة الجالي ليا هاب شرَّه
حنا الدواسر نشتري العز باثمان = محد(ن) لنا يحتاج ألا نــســرَّه
حنا الدواسر نكتب العز تيجان = عدونا خايب كسير(ن) نضرَّه
وتبقى علومه واضحه طول الازمان = والكل ينقل خزي عاره يجرَّه
حنا الدواسر نشرب الدم شفقان = لاصار بعض الناس للموت فرَّه
قالوا مثل واضح على شوف الاعيان = وقالها لنا التاريخ واشبح مقرَّه
الدوسري حر(ن) كفخ حر شيهان = أحرار والهيه لها كر فرَّه
أبدعتنا في القاف هاوي و طربان = والشعر عندي له مواويل جرَّه
تنصى اللذي يرسل مباديع الاوزان = تنصى صليب الصوت لله درَّه
من عقبها سلَّم على قوم شملان = وارسل لهم خطَّـي وكرر عبرَّه
من عقبها أدلج على القلب دخان = هم(ن) وغم(ن)شب ناره تحرَّه
ياناس أنا بالوقت أصبحت حيران = وقت(ن) لنا يخفي نوايا بسرَّه
من يوم شفت الحق ماعاد ينبان = وان بينه ناس(ن) تخاف المضرَّه
وان قال قولن سبَّه فلان وفلان = ويصير قول الصدق يلقى معرَّه
قلته كلام(ن) مجمل(ن) بين الاوزان = واللي يعرف السر يكشف سترَّه
ترى الرجال أصناف تنشاف باعيان = حزحيز مع لزليز وكل(ن) يبرَّه
والجنس تكرم منه خسران خسران = يحسب علوم الطيب قول(ن)يخرَّه
واختر رفيق(ن)يعجبك يا كحيلان = اختر رفيق(ن) هرجه ألماس درّه
كتبت لك قاف(ن)ولا نيب بحلان = أن أسطر ماخفى في مقرَّه
لكن حلاة الشي مجمل من ألوان = رد(ن) وتوجيه(ن) ونصح(ن) نفرَّه
حلبت لك من صافي الفكر ألحان = ذق اطعمه ويمناي جت به تدَّره
واختامها صلوا على خير ماكان = نبينا نفداه بمقدار ذرَّه