ياناس والله قلبي اليوم بيطير=لجل الفرح بإحساس غالي وعالي
إحساس رجل(ن) حيّر الوقت تحيير=ولقى مراده بعد طول الليالي
لقى مراده عند بنت المناعير=بنت(ن) أصيلة ماتهاب العوالي
بنت(ن) ثقيلة أصلها الطيب والخير=بنت الكرام الأسْد شهم الخصالي
إلى أقبلت لمّي لها شعري يدير=حرف(ن) مثل صقر(ن) بروس الجبالي
سطّر لها حرفي من المدح تسطير=ما طالها قبله كبار المعالي!
هي وصفها ماله قياس ومعايير=هي زينها إيفوق وصف الخيالي!
سبحان من صوّر بها الحسْن تصوير=لين أصبحت بالزين مضرب مثالي!
من زينها يبصر به أعمى النواظير=ويشهد على حسنه ملوك الجمالي
هي ريح مسك مقطّر بزين تقطير=وعيونها تسحر قلوب الرجالي
سهلة طبوع وما بها حب تعسير=أميرة(ن) للغيد أصل الدلالي
لا من حكت أصبح بالأنفاس تعطير=أبيع لجله كل حالي ومالي
هي وجهها مثل القمر شعّ تنوير=وخدودها من زود نوره يلالي
هي قولها ما فيه كذب(ن) وتقصير=وما فيه نم وحكي قيل(ن) وقالي
يا غالية لك في حشا القلب تقدير=يفداك قلبي يا بعد عمر حالي
شانك بقلبي اعتلا دون تبرير=قدرك ثبت ماله فيوم(ن) زوالي
سخّرت لجلك حبي اليوم تسخير=وأرخصت لجلك كل من كان غالي
إذا غلطت أحمل لك أجمل معاذير=محال أزعلّك فوقت(ن) محالي
وإلى بغيتي المدح جيتك بتعبير=مثل الشهد جذّاب حلو(ن) وحالي
واللي يذمّك يا بعدهم إيصير=مثل الذي يذم عمّي وخالي!
أدعي عسى دايم تكونين في خير=والله يجّنب عنْكِ حزن الليالي