يا الله إني طالب جزل العطية = راقع الخصات منشي بالغيومي
مقبل بالروح يبرق من شوية = هل وبله وانجلت منا الهمومي
كل شعب جاب سيله من شوية = حده العطشان للجزل مختومي
لين يظهر نبتها الحدبا المرية = عاد به ربي وهو كان معدومي
عقب ذا نرعيك في افياض عذية = واهتني بالقفر يا الملحاء الزعومي
زين شوف النزل في الأرض الفضية = والجهام الي كما وصف الغيومي
عندها ربع سوالفهم طرية = يكرمون الضيف والجار محشومي
مجلسٍ ما جاه تلاب الردية = ما تهرج فيه خراع وزومي
ربعنا الرجبان لا جات الحمية = فعلنا قيد الجمل عند اللزومي
ذي مواقفنا عصور الجاهلية = والفعايل مثل ما تبقى الرسومي
و إن وزانا خايف يطرد جنية = حقه الترحيب وامات الشحومي
والعدو ما نرحمه عند الخطية = لين يصبح طوع بالحق مخزومي
طير يا للي في السما رد الوصية = رد مرسولي ورجع بالعلومي
اتصل باهل الوفا واهل الحمية = واعمد الطيب وجنبها الرخومي
نصها ربع يحلون القضية = و اترك الرديان ما تقضي اللزومي
و السلام ختامها مني تحية = و اسلموا يا سامعين بالعلومي