يالله ياربي عليك التوافيق=اقبل دعا اللي قلبه معلق فيك
اغيب ساعه وارجع شوي وافيق=وانخاك ياللي قافي اليوم ناصيك
حر تعلا فوق روس الشواهيق=دهس وشعري جالك اليوم ناخيك
الطيب من بينك وبينه مواثيق=والجود والفزعه ترا من هقاويك
ماجاتلك منا ومنا تلافيق=ورث ورثته يادهس من مناشيك
ادخل عليك بجاه رب المخاليق=وادخل عليك بجاه خلقه وندعيك
وادخل عليك بوجه ربع مشافيق=اللي ترجا وقفة من مباديك
باسم الدواسر جيتك بدون تنسيق=وجمع القبايل يالسنافي تناديك
ندخل عليك بوجه من حده الضيق=ام تعلق قلبها يادهس فيك
تصفق بها شهب الليالي تصافيق=من بعد ربي يابيض الوجه ترجيك
تكفى وتكفى جيتك اليوم ما اطيق=حمل حملته جبته اليوم ناصيك
تكفى وتكفى مانبي منك تفريق=تكفى وتكفى والعفو من مباديك
الوضع مايحتاج هرجه وتعليق=الا يبيله وقفة منك واليك
العفو عند المقدرة للمطاليق=شرواك وانت اللي تنوشه بياديك
نايف ورا القضبان حمله كما طويق=روحه تراها كل ليله تناجيك
تكفون وانتم كلبوكم مطاليق=فكوه لام قيدتها الشرابيك