يا صاحبي قم تراك اليوم مرسالي=في جيب لكزس يغار اللول من لونه
جيبٍ جديد المديل ومشترىً غالي=ولا كل منهم تمنوا فيه يشرونه
وقفته هيبه وشوفه يشرح البالي=لكنها تقصر الهقوات من دونه
مصممٍ للشيوخ ارجال لعمالي=يبهرك من كثر شاشاته بطبلونه
بوديه كنه مرصع بالكرستالي=ولا ثمانٍ بدت من ثغر مزيونه
بالظلمه اذا كبست بنوره العالي=تقول برقٍ قفاه الرعد وامزونه
وصوته ليا من سريت بمغربٍ تالي=كنك تسمع مهنا جر بالحونه
متوجهٍ من عسير وخاطرك سالي=وجهتك جده غنى من خابت اضنونه
إنص الطنيني محمد طيب الفالي=اطريه بالطيب واهل الخير يطرونه
له مجلسٍ نص للأجواد مدهالي=والضيف يلقى غلاه وبهجة اعيونه
غالي ويفرح كثير بجية الغالي=ويقدر الضيف ويداريه ويصونه
اصيل ومعربٍ الجد والخالي=مثل الذهب ثابتٍ ما يختلف لونه
سلم على خشمه اوبلغه بأحوالي=وتنشده يا عساه ابخير وش لونه
وقله ترى صاحبك متضايق البالي=له عام يابو رعد ما طابت اطعونه
والله ماهو بيشكي قلت المالي=مجنون والله بلاه ابحب مجنونه
صابه هواها وسهم الحب قتالي=واقفت وهذا السبب في كثرة اشجونه
من دونها حال حسادٍ وعذالي=وصاحبك نوخ بقرب اطلالها اضعونه
ساقه معنيه من كثر التجوالي=وبيوتهم خاليه ما هي بمسكونه
يابو رعد عزوتي يا محتمي التالي=غزال صوب سهام الموت من نونه
حبه ملك خافقي (م)الجال للجالي=والقلب ما عاد يبغى غير مضنونه
لاني نسيته ولا شوفه تهيالي=ليت الموصين بوصالي يوصونه
الحب لا صار ما به قرب وأوصالي=خطرٍ على العاشق ايبيح بمكنونه
بأحط صورتّه خلفيه لجوالي= لو قالوا الناس عني ما يقولونه