الليلة اللي شعشعت بالعلم وبنور الحضور= ساقت هبوب الود كاديها وذعذع ندها
العلم نور وجمعة أهل العلم وأهل الفضل نور = وحضوركم يامير جملها وكمل ودها
يامرحبا يامعطي التاريخ للطالة عبور=حتى تعدى صيتك الارض وتجاوز حدها
إنكان غيرك ينحت الامجاد في صم الصخور= مجدك تطاول للثريا لين وسّم خدها
قبل ثلاث عقود ياسلطان فرحت الصدور = أحييت نار العز في الامة ويدك (تمدها)
تفاخرت بك أمة الإسلام في كل الثغور= بعد السبات إللي تغشاها وبيح سدها
يامرحبا فحلالنا إللي سطرت عبر الدهور = أعظم ملاحم مع هل العوجا (وكل يعدها)
يوم إنها سيفٍ حدب.. يوم إنها ملحٍ يثور= سيوفنا من دون حد أغلى الديار نحدها
إللي يسالمنا سلم.. واللي يعادي للقبور = الارض عرض ومن بنى بيوت الشرف ماهدها
ويوم أصبحت جنة تمايل في خمايلها الزهور = ترقد قريرة عين .. وعيون العدوّ إنسدها
لا للتخاذل في بناها.. والتهاون .. والفتور = يالعلم نطلعها سما.. لين النجوم تردها
حييت يامن جيت لاجل العلم وحضورك حضور = برهن على معنى الامارة والتواضع والدّها
لبيت دعوة شامخٍ صيته مع ابوك مخبور = رحلة عمر.. عشرة فخر.. مهيب جبها ودها
مران أبو زابن وريث المجد من ماض العصور=لاعدت أذكار الشيوخ إللي ينومس عدها
شيخة ولاء.. شيخة وفاء.. والمجد في الذهن محفور= مع معزي لين وحّد حدها لاحدها
متعّبة عوص النجايب يوم زل الشيخ كور= دون الوطن قومٍ تعديها وقوم تصدها
يامرحبا بك ياولد سلمان ياواف الشبور= وادي الدواسر سطرت لك كلمةٍ وتردها
حنا خوال أبوك وأجدادك وزاد النور نور= إنا خوالك أنت.. وأطناب الكرام إنشدها
أبوك سلمان الامارة والسدارى راس طور= وجدك رفع راس العرب من حدها لاحدها
وإليا ذكر للمجد ياسلطان يمنىً ماتبور = مدّ اليمين إللي على العليا تربت مدها