لي حاجة عيت تحقق من العام


لي حاجة عيت تحقـق مـن العـام
عيا يطيب الحـظ لـو قلـت أظنـه
يفـز فـزة غاتـر عقـب مـانـام
جنـه حلـوم مزعجـه وأيقظـنـه
وجدي على تحقيقهـا وجـد صـدام
علـى جموع ٍ بـالـولاء بايعـنـه
وبلاده اللـي ماعرضهـا للاسـوام
وعرش الرياسة والجيوش المرنـه
اللي قذايفهـا تعـدت ورى الشـام
شاميـر يـوم ولايـتـه روعـنـه
وبيوته اللي من سيراميـك ورخـام
خطط وصممهن علـى كيـف فنـه
ماتنتـعـدد تكلفتـهـن بـالارقـام
ماهـو مواطـن عايـدي يبهضنـه
حاكم من الحكـام ويصـدر الخـام
داره ثريه والــدول يدعمـنـه
متريّس لـه دولـة شعبهـا اقسـام
ويلعب على القسمين شيعه وسنـه
مخلـي ٍ شيخانهـم تقـل خــدام
يمشون قفوه خـوف ماهـو محنـه
ملا البيوت مـن الارامـل والايتـام
وملا السجـون المظلمـة والمجنـه
ياليـن طشنـه مقـاديـر الايــام
مـن النجـوم النايـفـة حولـنـه
مثل الوليشة بين عـدوان الاسـلام
من كـل صـوب انيابهم ينهشنـه
او وجد عـود يرتكـي كـل ماقـام
على كفوف يديه مـن كبـر سنـه
الليا غفـل بايامـه الماضيـه هـام
والليا انتبه من غفلته ( جر ونّـه )
من عقب ماهـو للمغاويـر مقـدام
اليـا غـزا صـم الرمـك يتبعنـه
ومروبـع يزمـي مثل عرق لـزام
اليا اقبلن شيـب الغـوارب نصنـه
بظهورهن ربـع كريميـن وحشـام
اليـا جذبهـم صـوت نجـر يدنـه
نجرن مسمينه هل الهجن عـزام
من كثـر مايجـذب شراريـب بنـه
واليوم كل اللي بقـي جلـد وعظـام
والمال خمس اشياه والبيـت عنـه
ماله عيال ينصرونه الليـا انظـام
الا بنـات ٍ بالهضـاااايـم شـوَنـه
ياقلـب خلـك للروابـع والاوهـام
رفيـق درب وكـل هــم ٍ تبَـنـه
والا انتفض واربط امحقـاك بحـزام
وعن قوم ( وش سويت ) خافيك كنه
والشر عنك اخـلاف والخيـر قـدام
والصبر في وقـت المعانـاة سنـه

الشاعر / عبدالله بن زويبن الحربي