الله من قلبٍ عوى عويـت الذيـب = ذيب عوى لجـت ضلوعـه ولجـي
عليك ياراعي العيـون المهاديـب = سـودٍ مضاليـلٍ وسـاع ٍ وبـجـي
سودٍ تشذب بسرة القلـب تشذيـب = طحت بخطرهـن يالله انـك تنجـي
سهومهن تسطي على القلب وتصيب = تخـج صنـدوق المعاليـق خجـي
ياصاحبي حبـك لقلبـي عواقيـب = ارفق علـي شـوي قبـل استلجـي
يا اللي عليك عيون الامه مراقيـب = تقـول بيـن شـفـاك درٍ يمـجـي
والخد براق المـزون المهاضيـب = اللي رعوده رجـت القـاع رجـي
يامنوتـي مافيـه شـك ولاريـب = منساك كود انسى صيامـي وحجـي
يابو نهـودٍ شلعـن مقـدم الجيـب = كمشمشٍ عرقه مـن المـاء ينجـي
من فوقهن شقرٍ تغذى على الطيـب = ريح الشمطري في طرفهـن يعجـي
ذيل اشقرٍ ينسف خلاف العراقيـب = تطلـب عيالـه بالمهـر والترجـي
هزت وزرفات السبايـا جناديـب = لوما شليل الصبـر والمـال هجـي
ذبحتنـي ياسيـد كـل الرعابيـب = فجيت قلبي يأريـش العيـن فجـي
فجن مثل مظراب شلفاء تراحيـب = شلفاءاً تخل الـدم الاحمـر يكجـي
لا وردة من كف مـرو المغاليـب = والخيـل كاسيهـا ضبـابٍ وعجـي
ياعاذل المشتاق مابالهـوى عيـب = ماذقت لذاتـه عسـى امـك تدجـي
لو ذقت من حلوه ومـره تجاريـب = مالمـت طـراد البنـي الغنـجـي
نجل العيون مزعلات الخطاطيـب = شعـوٍ عـذاب مقطعيـن الفرجـي
يم الحبيب اللي هروجـه تعاجيـب = ياعيـن لديلـه ويارجـل سـجـي