سمعت لي كلمه مدري وش اقصاها= حزت بصدري وانا ماني بهارجها
لو كل كلمه اليا جتنا طردناها = بعنا الثمينه بسعر مايخارجها
لومرت السمع ماكنا سمعناها = ونقفل الراس عنها لايبرمجها
ومن يم هذا لهذا مانقلناها=والناس واجد وتلقى من يروجها
من جابها بين خلق الله ووداها= لو به مراجل ترى نفسه يسمجها
من عامل الناس في سابق خطاها= يقعد بدار خلا ما داج دايجها
في كنة تشوي الجربوع رمضاها= تابس غصون الشجر من حر واهجها
والناس بالحق حكم الشيخ ما ارضاها= ماترضي الناس لو انك تحججها
ياللي تبي الطيبه خذها وعطناها = وخل الطريقه طريه لا تثلجها
واقضب طريق الاوادم وامش ممشاها = اتبع دروب العرب وادرج مدارجها
وارسم لنفسك حدود لا تعداها=من حط نفسه بدرب الضيق يحرجها
وان كان نفسك هواها قام ينحاها= حط الاعنه بروس الخيل واسرجها
وفكر بمنكافها قدام مغزاها= واضرب حساباتها وتشوف ناتجها
وكل بعضده يموح الدلو برشاها = وتلقى كبود الظوامي من يبرهجها
وان كان توك على صدرك تهجاها=حنا ترانا اندرس في مناهجها
من يم مصباحها نبعد معشاها=اليا قعد راعي الضلع يدرجها
لو هي صعيبه اليا انعاجت عدلناها= واللي تجي مستقيمه مانعروجها
نهتم في وزنها وابرام معناها=ومن الكرستال واللؤلؤ نتوجها
مثل الجواهر اليا منا نضمناها= وسلوكها من جديد الزري ننسجها
مخايل ترتدم والصدر منشاها=ان دك بالبال داكوك يهيجها
واليا امطرت ضاقت الوديان في ماها=تاخذ اليالحول مايبسة مدالجها
ان صدت الناس عنا ما اعترضناها =ماتقفي الناس عنا وانتو لجها
وان جاتنا الطيبه بالطيب زدناها= الطيبه بالعسل والسمن نمزجها
وان جاتنا الثانيه نصبر ونرفاها= يمكن اليا فاق راعيها يعالجها
وان عادها عودة ما عاد ينساها= من حربة في صميم الصدر نولجها
مسمومه يبلش الدكتور بدواها=ماينفع الخبل لين انه يلامجها