ياهاجسي حضر ترا واجبك حان=وليا طلبتك لاتتنا عليه
حضر من الجزلات في مدح فيحان=شيخ كفوفه بالكرم حاتميه
أبمدحه بين الملا سر وأعلان=ومدحه وتقديري لزومن عليه
المرجله سهله على كل ديقان=وتصعب على راع العزوم الرديه
سلام يافيحان ياطير حوران=يالقرم ياراع اليمين النديه
ياطيب السمعه وياعالي الشان=في قمة الامجاد سيرتك حيه
يالساطي الضرغام يالليث ياحصان=يالكفو يالساس الظفر والحميه
ياماس يافالوذ يالسيف شامان=يامحزم(ن) فالضيق ينجد خويه
يامدله الجيران يامزبن الجان=أنته علومك كلبوها طريه
ياطيب المجنا سلايل كحيلان=يامارثة محماس زبن الونيه
يوم الجهل والسيف وأسنان وعنان=فعله يبان بكل موقف وهيه
واليوم في نعمه وفي خير وأمان=والحمد للخلاق رب البريه
في ظل أبو متعب وفي ظل سلطان=والحكم شرع الله وسنة نبيه
ونايف ليامن الزمن كشر وشان=نايف فخر للعزوه الفيصليه
وأمير نجد أن صار بالجو دخان=حصن لها من كل فتنه وسيه
وصلوا على خير البشر نسل عدنان=ماذعذعت الانسام تالي عشيه