زين المجاهيم ياللي عنّه اتسالي=عانه بسودٍ مع ابن عبيد تلقاها
سند الغوارب كبار جروم وطوالي=سبحان ربٍ مصورها وسوّاها
هزع الفقاير وكن اظهورها جبالي=الله من اهل الحسد والشر ياقاها
بالزين والجبر ما تلقى لها امثالي=كم واحد يوم ينظرها تمناها
تفرق بطول الرقاب وروس واسبالي=واذانيٍ كن روس الشلف حلياها
واعظامها والخفاف كبار وثقالي=عسم الايادي يشوق العين ممشاها
ليا مشت صف مايبقى لها تالي=يثور عج الصحاري يوم تاطاها
وبساحة العرض لامن جات زرفالي=يرتاع منها منافسها ليا جاها
تعب عليها عريب الجد والخالي=سعد البريكي وتزهاله ويزهاها
صميدعٍ ينعرف في كل الأحوالي=حاش المراجل من ادناها ليا اقصاها
قرمٍ بسوق المراجل يرخص المالي=كفه بفعل الوفا والجود ضرّاها
دايم لربعه وللضيفان مدهالي=يبعد هموم الضيوف ويكرم لحالها
في قمة المجد له مدهل ومنزالي=طلع على المرجله حتى تعلّها
شبلٍ ظهر من عرين اسود واشبالي=ضواريٍ دايم مايقرب حماها
اصله وفصله من ال بريك الابطالي=قوم بوقت الملاقى تعرف اسماها
عقّال في السلم وان جا الحرب جهّالي=قبيلةٍ نفتخر لا من ذكرناها
حنا وهم كلنا من موكرٍ عالي=دواسر من حداه الوقت ينصاها
نطاحة المرجله ماضين الافعالي=قومٍ تعز الصديق وترهق اعداها
ليا تعلوا على عجلات الازوالي=كم حلةٍ مع طلوع الشمس تفضاها
ياجاهلٍ مجدنا ماضي ولا زالي=امجاد في صفحة الحاضر كتبناها
حنا الدواسر هل البل بأول وتالي=نفتكها وان غزيناها كسبناها
عادتنا لاحتمى القيض اشهب اللالي=كم ذود شيخ من مراحه شعيناها
وان جا يبي ردها نطوي به الجالي=بمخيرات صدور القوم مرماها
قد قالها شاعر من ماض الاجيالي=كلمة فخر قالها وانّا حفظناها
من بندق الدوسري قصّاف الآجالي=سو البلا بين ملفضها ومجراها
وان ثار عج الرمك ثم جاله ظلالي=خيل العدا من وحمنا تطرح فلاها
عاداتنا نفرق الغالي من الغالي=كم خفرة من لقى الغالي حرمناها
نفخر بزين الفعول جداد وسمالي=وايضا حقوق القبايل ما نقصناها
كل القبايل ترجّح كل مكيالي=بالعز والمرجله تظهر مزياها
والختم صلوا عدد ما هل همالي=على النبي سيرته بالحق نتلاها