يابن بطي ياتاج راسـي وساسـي=يافزعتي ياطيـب الذكـر والجـاه
لايادغـش لايابعـد كـل ناسـي=مثلك عزيز ونادرٍ شـوف شـرواه
مثلك من العربـان للعـز راسـي=ولااظن بدروب البخت ضاعت ارياه
يالدوسري صارت علينـا ماأسـي=واقفى بخيص السالفـه مالقينـاه
حضـارةٍ مابيـن كـوبٍ وكاسـي=تاخـذ ولاتعطـي وهـذي مزايـاه
صارت لحصانيها ورقط البساسـي=والذيب وسط شبوكها صار مربـاه
والسيف بدل في طوال الحساسـي=والمشيخه صارت لهيـسٍ جفينـاه
امست مراجلها لها الكـل ناسـي=ولعيوبها يامـا تسابـق مطايـاه
يبن بطي واشتد ياخـوي باسـي=لاماقدرت افـرق طمانـه وعليـاه
تمرجلو بالهرج نـاسٍ خساسـي=والكل منهم شيـد اليـوم مبنـاه
الهيس امسى بالمقـام متواسـي=ورجالهـا تنعـي زمـانٍ فقدنـاه
يافزعتي يبن بطـي تـاج راسـي=عطنا الحلول اليوم يالشيخ عطناه
حنـا نفجّرهـا بوقـم ومقاسـي=والا نخليـهـا لمـنـهو تنـصـاه
مختلـةٍ فينـا العقـول الرواسـي=جتنا ولكـن يالخـوي ماعرفنـاه
مختلفةٍ فـي مشيهـا واللباسـي=يالله دخيلك واحـدٍ هـو رجينـاه
عن موق عيني طار كل النعاسـي=مادام بارود الـردى طـال مرمـاه
يبن بطي ياتاج راسـي وساسـي=من ينتخي بك قربته ضايـعٍ مـاه

الله مـن هجـسٍ تصافـق برآسـي=يصفقْ براسي صفقة الدلوْ وإرشاه
والعيـن عيـّت لاتـذوق النعـاسـي=عافت لذيذ النوم مـن شيـن ماجـاه
من عقب خط اللي كتب لي وقاسـي=قاس العلوم وجـورِ وقتـه وشكـواه
حـدَه زمانـه ليـن طـاح متواسـي=وسنَّد علـي شكـواه والهـم يبـراه
يامرحبا باللي به الطيب كاسي=إعداد ماهـل المطـر وإنتثـر مـاه
لاباس ياشيـخٍ له الوقت قاسي=يالشمري عذب النبا ريف من جـاه
أنته وخطك منزلـك فـوق رآسـي=وأنته وأنا مـن يرتجـي فزعـة الله
الواحد المعبود مجلي العماسـي=سبحانـه القـادر علـى مـاتـوَراه
لاشك سُفنك في محيطـي رواسـي=وعندي عهد مآأخلِفْ لمن مـد يمنـاه
تشكي زمـانٍ ربعـوْ بـه إخساسـي=وعاكس لربعٍ جاههم بالعـرب جـاه
كنَكْ قريت الخافيـه مـن إحساسـي=وكنَكْ عرفت بما حوى الصدر وأخفاه
وأنا زماني شيّب بنصف رآسـي=وكل الكدر ذا اللـي ذكرتـوْ لقينـاه
وإاليا قلت داله قالوْ النـاس ناسـي؟=وإليا قلت حالي قالوْ الناس وش جاه ؟
وأنـا ترانـي ملبسـي مـن قياسـي=وأعرف خفايا ماخفا الخـط وأقـرآه
فأحيانِ يآخذنـي بشعـري حماسـي=وأحيان أعيف الشعر والوقت وأنسـاه
وياطير شلـوى يابعـد كـل خاسـي=إصبر على جـور الليالـي وبلـواه
ترى الزمن يشبـه حيـاة الدراسـي=ومن يجتهد ياصاحبي حصَّـل إمنـاه
والريح مازعـزع إجبـال رواسـي=والذيب يآكل لو حرص راعي الشـاه
هـذا كـلام الدوسـري بالمقـاسـي=وإسلم وسامح ياأبـو مـروان بأتـلاه