ياراكب اللي لاشْلعت وقت مسفار=تشدي لغر السحب لامن نتلها
سردا تبوج البيد وتبوج الاقطار=تطوي محيطات البحور ودولها
لامايثنيها بنايات واسوار=متعلّيه من فوق قمة فللها
لامن نتلها فالسما تشوق الانظار=وليا اقبلت كن السعد في قبلها
ماكنها الا حر لا جات محدار=هاجم بعنفٍ والفريسه قتلها
سواقها طيّار لاقيل طيّار=دارس وفاهم في مكامن خللها
وان كان رب الكون عداه الاخطار=ينصا هل امريكا وضواحي حللها
وصل سلامي فيه من نفح الازهار=امن الخزاما والبختري ونفلها
واثن التحيه عد همّال الامطار=واعداد ماتنبت حشايش سهلها
سلم على شيخٍ كسب طيب الاذكار=تسلميةٍ ترقا عوالي قذلها
ثم حب راسه كاسب الجود والكار=اللي ليا مالت علينا عدلها
ابوي جعله من طويلين الاعمار=سامي بطيبه والنوايف نزلها
ابوي يوم الجار خوّن به الجار=يسوم روحه مايدور بدلها
من دون داره ما تنمّق بالأعذار=من دون داره صامدٍ ماخذلها
يوم العراقي جاك بالجار غدار=لاماتراخا والشجاعه نهلها
ابوالوفا جعله مجارٍ من النار=وابو اليتاما جفون عينه بذلها
وسلم على اللي بالصعيبات مغوار=اخوي لاثقلت علينا حملها
يجزاك ربي خير يالوافي البار=برجس اخو نوره ليامن نقلها
برجس صبي الطيب لو صار ماصار=هذا عضيدي لاشكينا ميلها
واطلبك يارحمان ياوال الاقدار=تجعل كويت العز تفرح باهلها