والله ماسمع شورهم يالمغاتيـر = مالى ومال مجمعيـن الحكـاوي
أبيك لامـن قربـن المحاديـر = ثم جهزو مابين سارح وضاوي
والله لتزورين الفياض المخاضير = وترعينها قدام شابك وشـواوي
واني لخض بك القفار المقاطير = الى بها للصيـد شفنـا مـلاوي
في خايع جاين لنبتـة نواويـر = فيه النفل ويا الحماط متسـاوي
البل لهـا بقلوبنـا كـل تقديـر = ولانستمع في ميتيـن الهقـاوي
مدهال دق ابكارها والمعاشيـر = في نايفات النفد والمـاء يـداوي
في عثعث مالاوعوة الصقاقيـر = نلقى بها لبرق الدواغر حراوي
يازين في ريضانها هدت الطير = يطرب ليارف الجناح الرهاوي
مجلاسنا في عاليات المسابيـر = بعد طلوع اسهيل كـل يـراوي
لاتبكو اخيامهم حـزة أعصيـر = ثم حطو الشبه بذيـك المحـاوي
وصفو دلال بالعويـدي مباهيـر = والعود الازرق خالطينه بجاوي
يسوي حياة اللى يعـد الدنانيـر = راحت حياته والمسيكين غـاوي
يرزقني اللى يرزق الداب بالبير = وتشبع ولوني من الجوع خاوي
وأحد يحطه بين طنجه وأغادير = وأحد يحطه بالشيش والقهـاوي
وأنا أحطـه للبكـار المشاهيـر = شم الشعاف مطنخات العـزاوي
نمشي ملوك ولانهاب المقاديـر = ولا الفناء لابد بالعمـر طـاوي