::: مـنتدى قبيلـة الـدواسـر الـرسمي ::: - مساجلة بين ابو عدي وسعود الازرق

- :: قسم الـشعر العــام :: (http://alduwaser.org/vb/forumdisplay.php?f=16)

- - مساجلة بين ابو عدي وسعود الازرق (http://alduwaser.org/vb/showthread.php?t=53545)

مساجلة بين ابو عدي وسعود الازرق

السلام عليكم ورحمة الله وبركاته

عيدكم مبارك ... وكل عام وانتم بخير

هذه ابيات قديمة وهي عبارة عن مساجلة بين الشاعر مبارك بن محسن بن مسرع " ابو عدي" والشاعر الكبير سعود الازرق المخاريم الذي يعد من كبار شعراء قبيلة الدواسر الحاليين وهو بعيد عن الإعلام سابقاً وحالياً.

حيث يقول ابو عدي:

قد لي سنه وشهور والبال محتاس = والعين من نوم العباد محرومه
صبرتنا واصبرت واقول لا باس = وعزي لم مثلي تزايد همومه
لاجيت ابدله دك بالقلب هوجاس = واخذت في بحر الهواجيس عومه
سبّة زمان(ن) ماصفالي مع الناس= واللي لعن دنياه قبلي ما الومه
فيا جاهل الدنيا ترا مالها ساس = فيها الجفا مابين ليل(ن) ويومه
فيا راكب اللي لا مشى هجعة الناس= ياصل وولد اللاش غرق(ن) بنومه
جمس(ن) عليه من المناعير مدباس = مدباس حرد(ن) ماضيات(ن) علومه
ياصل صبي فاللقاء يرفع الراس = ... ............... يسأله من لزومه

فقال سعود الأزرق :

يامرحبا بالخط ترحيب غرّاس = سمع الرعد شاف المطر في قدومه
شرب النخل قاد الأمل عقب الافلاس= من عقب موت الياس قويت عزومه
حييت ياحبر(ن) على فرخ قرطاس = دزّه عزيز ودز فيه معلومه
يقول عينه ما تهنّت مع الناس = وعين الشقي فيها الشقى ومحرومه
يشكي وانا من بعض الاشخاص حسّاس= شكواه من جور الزمن .......
اصبر بصبر عبيد ورشود وادباس = اصبر ولو إن الحقوق مهضومه
اطلب ولي(ن) خالق(ن) سبعة اجناس= اللي نصر ناس(ن) وناس مهزومه
لا بد من يسر(ن) عقب عسر واتعاس = ولا بد برد(ن) عقب لفحة سمومه
هذا وقدرك يابن محسن على الراس = ومن غيركم يالقرم نقضي لزومه

ملاحظة:

القصيدتين لها فوق العشرين سنة وقد سقط بعض الابيات من قصيدة الشاعرين لقدم القصيدة وهذا اللي قدرت احصله .. والسموحه على القصور.