لجناب يا مقدم على مخذ الاجناب = اسمع نصيحه ما ندور جزاها
الاجناب بالتالي غرابيل وانشاب = ومشاكل ما ينحصر لك غثاها
ابشر بناس بين خادع ونصاب = ارجال مير الامر بيد نساها
تعطيك مطلوبك على العقد واكتاب = في عرسة ما تملك الا غطاها
باقل مهر ما يكلفك باحساب = وأنت ابزواجك ذا المسهل تباها
متوهم انك فزت بالزين واعجاب = في غادة ما لاق عينك سواها
مهلك اشوي اشوي وايبين ما غاب = لا لا تعجل وانتظر وش وراها
لا يخدعك في المبتدا ضحكة الناب = خذ في الحساب السم في حلوماها
تغر به عقلك بتدليل واداب = عجايب يلعب براسك رضاها
حتى تشوف ايجي لها راي وانجاب = واتصير لبسة خاتم في يدها
واعطيتها المفتاح في كل الاسباب = مع قلبك اللي ذايب في غلاها
هالحين يظهر طبعها في تقلاب = ويبدا المبطن ينكشف في لغاها
اقلاق و اصراخ و تبذير و اكذاب = والهد وما تهدي لقلة حياها
مع نقنقة متواصله طنب واسهاب = ما تنقطع في صبحها مع مساها
في بيتها من خبثها تنهب انهاب = تبغي خراب الزوج يقطع رجاها
تطاولت بالسان يلدغ كما الداب = لحقك ولحق اهلك شظايا اذاها
عقب الهداوة قنبت فيك قناب = واذا قصير البيت لجة رغاها
و اتعيب ما جبته من الطيب واطياب = غبرا وسوء التربية في بناها
مع ذا تطالب كيد في جلب الاقراب = للمملكة من اجل تقوي عصاها
اما السفر للاهل ما دونه احجاب = تنقل وراه من الشنط ما طراها
وتفرض ركوب الطائرة فرض واركاب = وترفض بكل اصرارها ما سواها
في كل عام ازيارة لو بمشعاب = تعويض عن مهر قليل عطاها
هذا الزواج اقساط لو طاب من طاب = ثلاثة اعوام ومليون جاها
فالحق من يقدم على بنت الاغراب = لقا الخسارة والندم من خذاها
مهما تدوم ادوم في دوم الاسلاب = تبلا ويبلا الحب في منتهاها
بنات جنسك ما تعوض بالجناب = لو زينها من دون يا ما حلاها
ترفاك وتعينك على الدهر لاصاب = والله سترها بالحجاب وحماها
مال وجمال ودين كاسيه جلباب = و اصل و فصل رافع مستواها
ونسب تماري به الى عد الانساب = بنت الحمايل رابح من حواها
فرق الغريبة صيدة غراب و اعقاب = بانت ولا يحتاج شرح امعناها
ذا موجزٍ قدمت في فتحه الباب = والا الخفايا ما يقدرا حصاها
قدمت للعاقل مفاتيح الابواب = مشاهدٍ وضحت للي بغاها