البارحه كني على معلم طويق=اجاوب السرحان لامن عوالي
وكل ماعوا جاوبته بونة الضيق=إعواه جوع وونتي ماجرالي
وانا على بوح الصناديق ماطيق=لكنّ صوت الذيب حرك خيالي
وقمت اتخيلني على معلم طويق=اجاوبه لامن عوى من اجزالي
كنه يقول انته بروس الشواهيق=واعرف ترى ماهيب سهل المنالي
خل الهموم وبوح سر المغاليق=ومن باح سره شاف كثر الهوالي
بعلمك شين درسته بتدقيق=وهذي نصيحه من رفيقٍ موالي
صاحب هل العليا وجنب عن الهيق=ترى الصبي من سيره باحتمالي
واحقر هل النمات واهل التلافيق=اللي يذمونك ليا جا مجالي
وادمح عن الزلات لوهي مسابيق=وان كررت عطها بحد السلالي
واحذر عدوك لايجيله تلاحيق=وعادة شجيع القوم لا مايمالي
واكرم ضيوفك بالذي عندك يليق=الجود بالموجود قوتن ومالي
واعرف ترى رجلٍ بلا ربع في ضيق=ورجلٍ وسط ربعه عزومه جلالي
وعامل جميع الناس حسب التناسيق=أحدٍ سوا وأحدٍ عزيزٍ وغالي
وارفع مقامك عن جميع المخاليق=خلك عزيزٍ رافع الراس عالي
وإليا بغيت الطيب يتبعه توفيق=ناسب معرب من عمام وخوالي
ياتيك صبيٍ له خوالٍ مطاليق=والصبي طيبه عايدٍ للخوالي
خل الجمال وخل عنك الغرانيق=لاياخذك زين الدلع والدلالي
لاصار مال الطيب فيها تعاليق=ماهيب لامكسب ولا راس مالي
ياتي ولدها مثل ماقيل دنيـّق=قلبه فضيخ وعايشٍ بالهبالي
وإن كان ياذيبان ماجت توافيق=عود ليامن شفت نور الهلالي
خلنا نبوح الضيق في قمةطويق=وأحذر تناساني تراني إلحالي..!!
قلت الزمن هذا زمان التواهيق=خبرك عتيق وماضي العرف زالي
الصدق ماتلقالك اليوم صدّيق=وماعاد تلقا فالزمن ذا رجالي
ان كان بك مصلوح تلقا مطاليق=وإن كان ماعندك غديت بهيالي
حتى المراجل بالمصالح تسابيق=تبدلت عاداتهم بالريالي
وهذا زمانن شاخ فيه الزناديق=من عقب ماهي تنوخذ بالقتالي
وحتى الخوي لامن نخيته من الضيق=مايظهر الفزعه ولاهو يبالي
والناس لو عاملتهم بالمصاديق=إن كان ماهجدتهم عزتالي
الناس واكثرهم سواة السواحيق=إن كان منتب ذيب صرت الحثالي
باعلمك..!! كلٍ بنفسه وتويّق=وكلن يشوف انه سواة الجبالي
اترك جميع الناس جمعٍ وتفريق=الا مع الطيب كريم السبالي
باعلمك ياذيب ياعلك اتفيق=عش عمرك بعزه وحيدٍ وعالي
في عالي الدنيا على هامة طويق=قد فات خبرك ياعهيد الطوالي
ونا ترا باجيك لاغصّني الريّق=وبجاوبك لامن عويت بخيالي
والله يفرجها عوين المخاليق=قادر يفرجها عظيم الجلالي

وسلامتكم ...