::: مـنتدى قبيلـة الـدواسـر الـرسمي :::

::: مـنتدى قبيلـة الـدواسـر الـرسمي ::: (http://alduwaser.org/vb/index.php)
-   :: قسم تاريـخ قــبـيـلة الــدواسـر :: (http://alduwaser.org/vb/forumdisplay.php?f=11)
-   -   قصة بين إبن عيد الغياثات وكمعان العجمان وقصيدتها (http://alduwaser.org/vb/showthread.php?t=4871)

دغش البطي 21-09-2005 07:54 PM

قصة بين إبن عيد الغياثات وكمعان العجمان وقصيدتها
 

فيه سنة من السنين الممحلة على ديار الغياثات رحل محمد بن عيد الغياثات من أهله وجماعته وديارهم على فرسه الكحيله ومتوجهاً إلى الوادي وادي العجمان وكان ذاك الوقت بين الغياثات والعجمان صلح ويوم جاء إبن عيد العجمان أكرموه وكانت فرسه الكحيلة هزيلةٍ جداً من سبب الدهر ولامعه منايحٍ لها وكانت غاليةٍ عنده وكانت أيضاً ( مبطح ) أي لقحه على حصانٍ أصيل.

وبعد يومين وهو جالسٍ في مجلسٍ من مجالس العجمان سأل أهل المجلس بقوله ياجماعه من اللي منكم يقدر يضم الكحيلة (المبطح) وله نصفها سواءٍ هي أو بطنتها اللتي في بطنها وقال راشد بن مشلح آل سفران أنا اللذي عندي إستطاعةٍ لضمَها وعندي منايحٍ بتظمَها وقال له بن عيد من اللذي يكفلك ياراشد قال بيكفلني أخوي كمعان وقال بن عيد بتكفله ياكمعان قال نعم ثم قال لهم بن عيد خذها ياراشد والله الله فيها تكفى ياراشد تراهي غاليةٍ عندي وتراهي فرسٍ سابق.

ثم قال إزهلها المهم أخذ بن عيد له أيام ورحل جنوب لجماعته الغياثات وترك الفرس عندهم حسب الأتفاق بينهم وبعد مدَة أفلت الكحيلة وجابت مهرة أسموها (دوجة) ولقد تأخر بن عيد عند جماعته مايقارب السنة ولمَا فاتت السنة أراد الذهاب للعجمان وإلى راشد لكي يشوف الكحيلة ووجدها عندهم وإلا والله بنتها المهرة (دوجة) قدها حولية وإلى والله الكحيلة هزيلةٍ جداً مثل حالتها الأوله وذلك بسبب الأهمال من راشد واللذي لم يكرمها حسب إتفاقهم وقال إبن عيد خنت الأمانة ياراشد ويش قوم الكحيلة هزيل ثم رد عيله راشد بقوله أنت حكاك واجد وكذوبٍ ياإبن عيد تقول إن الكحيلة تلحق ولاتنلحق ووجدناها عكس ذلك ولكن اليوم أبي آخذ بنتها دوجة وأنت أخذ (همشيتك وكدشيتك) يقصد الكحيلة وأخلص منَا ونخلص منك، قال ابن عيد : طيّب مايخون العهد الا خايب الرجا.

ثم إن أخذها إبن عيد وتوجه بها إلى (ليل المتلقم) أمير آل هادي العجمان ولقد رحَب به ليل وقال له ويش علومك ياأبن عيد وعلَمه بالعلوم كلها قال له ياأبن عيد راشد وأخوه كمعان محقان لكن أبشر بالعوض لك ناقتين منايح للكحيلة لمدة شهر ولكن بشرط أن تجلس عندنا تحلب لفرسك وقال له تم وإتفقنا وجزاك الله خير على هذه البادرة الطيبه.

وفي فترة جلوس إبن عيد عندهم فآجأتهم غارة من (الفغمة) فخذٍ من فخوذ مطير وأخذو إبل ليل المتلقم كلها بما فيها منايح فرس إبن عيد وفي هذه الأثناء ركبو العجمان كارين بخيولهم على أثر إبل المتلقم وكانت بنت ليل تقول له تكفى ياشايب تقصد إبن عيد الابل غدوبها القوم إلحق مع ربعك وكان يربط سرج الكحيله على هونه ومن ثم ركب إبن عيد الكحيلة وفزع في ساقة العجمان وكان هذا الكلام بعدهم بلحظات ....

المهم إنه في أثناء توجهه للأبل وجد في طريقه ولد ليل المتلقم صويب ومكسور كاسرينه مطير ووجد فرس ولد ليل معقورة عنده وكر فرسه في ساقتهم بسرعةٍ فائقه حتى لحقهم ودارت بين المطران والعجمان اللي معهم إبن عيد معركة كبيرة ردوَْ إبلهم وكسبو من المطران بعض القلايع ومن ظمن اللذين كسبو إبن عيد الغياثات قلع ثلاث من الخيل فرسين وحصان ومعهن قعودٍ أشقر ...

وبعد ماردَوْ إبلهم العجمان ومعهم القلايع أكرمهم ليل المتلقم كرامةٍ كبيرة جمعت وجهاء العجمان والفرسان الشجعان اللي ردوْ إبل ليل المتلقم وإبن عيد معهم وقال إبن عيد ياليل علمك طيب عندي أما الحصان فهديةٍ لك وتستاهله وأمَا وحدةٍ من الخيل فهديةٍ لولدك ليل عوضٍ له في فرسه المعقوره ولابقى مع إبن عيد كون فرسٍ وحده إسمها المليحاء.... وانشد ابن عيد:


ياغوج والله ما قنيتك لعجمـان=اللي يحطـون الصعـب مرجعانـي
ياكود يأتي الضرب عن تالي الاضعان=فالعذر مـن الله ومنـك ياحصانـي
لحقوا ملحقات الطراد (آل سفران)=يقدع شابهـم راشـد المطربانـي
بمصقلاتن صاغهـا كـل سكـران=تلقـى مواقعهـا خـلاف الأذانـي



وبينما أهل المجلس يتكلمون بالسوالف الطيبة بينهم تكلم كمعان السفراني لأنه كان من ظمن الحظور وموجهاً كلامه لأبن عيد وقال إثرالكحيلة سبوقٍ ياأبن عيد ،،،لأنه تهول هو وكل القوم من جريها ولحوقها إياهم بفترة وجيزة في ذاك اليوم ورد عليه إبن عيد وقال أي والله سبوق لكن أهفيت حظها أنت وأخوك راشد لكن إسمع ياكمعان أطلب من الله العلي القدير أن أتواجه أنا وأنت في غزوة وأنا على (الكحيلة) وأنت على بنتها (دوجة) حتى أردَك منيع وآخذ بنتها دوجة قلاعة ورد عليه كمعان وقال له لاتمنى ياأبن عيد والله ثم والله إن أقنعك الغارة عن قريب حتى نشوف علومك كلها ثم قال له بن عيد أتمنى من الله لاغرت علينا إني موجود مع الربع الحاضرين.

وبعد أيامٍ قليلة نوى إبن عيد الذهاب لقومه وأهله وكلَم ليل المتلقم يطلب الرخصة منه حتى يرخص له ويمشي معه سيَر حسب السلوم المتبعة للبادية ووافق المتلقم وقال له هذا ولدي ياأبن عيد سيَر يبي يرافقك حتى يعديك ديار العجمان وتاصل لديرة ربعك وفعلاً مشى إبن عيد حتى وصل أهله نازلينٍ عند الزبيَرة أو رجم بيَن في دكاكة الملسونية ويوم جاء أهله وشافهم لينهم ماغير خمسة بيوت فقط .

المهم وصلو أهلهم وأكرم إبن عيد ولد ليل وعشَاه وبات عنده ذيك الليلة وفي الصباح وادعه وتركه يذهب لأهله وبعد ماذهب ولد ليل سأل بن عيد قصراه وين جمايعنا ووين وقيان ووين الغياثات وقالو له جيرانه وقيان والغياثات جنوبٍ في الحمض عند المعنونه والمصقرة اللتي هي يقسمها خط الرياض الأحساء القديم الآن لكن ليه ويش قومك تسأل ياأبن عيد قال له أنا متعاورٍ أنا وكمعان وبيواجهنا وبيصبحونا الصبح وحنَا قوم أخذ لكن غبشو الأبل جنوب صوب حروة الجماعة وحنا بنشتد على قفاكم وأتفقو على ذلك ويوم أصبحو اليوم الثاني جاتهم الغارة من العجمان على رأس عقيدهم كمعان ويوم شاف القوم بن عيد أطلق طلقات في الهواء لتنبيه جماعته وفعلاً سمعو الرمي وفزع وقيان والجماعة وعندما تواجهو سأل إبن عيد القوم ياقوم من عيَن كمعان قال دونك ياابن عيد ياسعد عينٍ واجهت من تمتني وظهر على فرسه (دوجة) وتواجهوْ حسب أمنيتهم اللي تمنوها من قبل كل الاثنين وطلبوها سابقاً وتخالفو الأسهم أي السلاح ويقال إنها رماح ولكن الله قدَا سهم إبن عيد وضرب كمعان وطاح من دوجة صويب وقلع دوجه وأستمنع وأمنعه بن عيد وكان من ضمن الغزية ولد ليل جاي كدليلة للعجمان وكان على ظهر الحصان اللي عطاهم إياه إبن عيد اللي كسبه من المطران ولكن ولد ليل وقع منيعٍ في يدين سداح الصمامخه المظالمه الغياثات.

وبعد مآإنتهت الغارة وكسبو خيول وجيوش من العجمان ورجعو وجد ولد ليل منيع في يدين سداح وبعدها طلب بن عيد من سدَاح اللي منع ولد ليل أن يعطيه إياه وحصانه وقال له سدَاح جاك ياعم يقصد بن عيد والسبب اللي خلى بن عيد يطلب سداح علم ليل المتلقم الطيب لأبن عيد وبالفعل عطاه إياه وعندها سأل إبن عيد ولد ليل هل أبوك حاضر يوم غزيت علينا ؟ قال نعم قال أبوك راضي تغزي على الحصان ؟ قال نعم قال له بن عيد أجل الحصان وصل أهله أمَا أنت فأبوك مسوي فيني معروف أخذ هاذي الذلول تزملك أنت وكمعان وخوياكم المنعاء وروحو إلى أهلكم ولقد أنشد إبن عيد هذه القصيدة..





يامرحباً بك يامـضنــة فــــــؤادي=بنت الكحيلة مثل ظبي المسايـيـل

لاسمعت الصيَاح قامـــت تـرادي=ماهمَها إلأ تجمع الرأس والــذيــل

عــريـضة الجمـهاه قـبَاً إســنـادي=تآخذ على خيل المعادي مشاويـل

مـن خـيـل داوودٍ لـك الله وكــادي=من الأربع اللي جودتها المحابـيـل

لاهج زمل الـلـي نشـعه الـزبـادي=لادبـرت خـيـلٍ وخـيـلٍ مـقـابـيـيـل

إن كان مانطحت السرايا إعمادي=شدَوْ يـمـيـنـي لاتجي عقَر الـحـيـل


وسلامتكم جميعاً

محبكم ومغليكم : دغش البطي الغياثات

مترك المسعري 21-09-2005 09:39 PM

لا هنت أخوي دغش البطي على القصة الرائعة



و الله و النعم بالغييثات و العجمان



و لا تبطي بجديدك يالغالي ,,,,,,,,

عبدالله الصخيبري 21-09-2005 10:21 PM

ابو محمد بيض الله وجهك على القصه وعوايدكم الناموس ياموسعة الحدود

الشكري 21-09-2005 11:11 PM

مـن خـيـل داوودٍ لـك الله وكــادي=من الأربع اللي جودتها المحابـيـل
لاهج زمل الـلـي نشـعه الـزبـادي=لادبـرت خـيـلٍ وخـيـلٍ مـقـابـيـيـل
إن كان مانطحت السرايا إعمادي=شدَوْ يـمـيـنـي لاتجي عقَر الـحـيـل


محب الجميع ومحبوبهم ( دغش بن بطي )

العلوم الطيبه عندك تزين وتبان

هذي عوايدك وعوايدهم شجعان وقروم

والعلوم الوافيه عندك وعندهم

كفو والله كفو

بارك الله فيك

وعساك على القوه دايم الدوم


اخوك

ابو عبد الله الشكري




نمر بن الأشيب 22-09-2005 01:30 AM

الأخ الشاعر والراوية .. دغش البطي ..


جعل يمينك ما يجيها العطب ياكحيلان ...

على ذا الرواية اللي خطيتها ..

واللي يتنومس بها .. بفعل ابطالها الغييثات ..

والأبيات الشعريه اللي قالها ابن عيد ..

لقد كان الوفاء متأصل في نفوس الأوليين ...

مع ماكانو يكابدونه ويعيشون فيه ..

من ضنق العيش ومصاعب الحياة ..


ورحم الله الشاعر القائل ...

يحول يسلم القديميين ما اصعبك = من لا عرفهم شك في وزن جيلي




تقبل كل الود والتقدير




أخوك في الله

العرابي

ابو غصين المشاوية 22-09-2005 02:25 AM


فهد الغريري 22-09-2005 11:39 AM

السلام عليكم ورحمة الله وبركاته

الشاعر الكبير الراويه العزيز ابومحمد "غش بن بطي الغييثات"



من سلايل زايد كل شغموم عديم=فايزين بالفضايل تعاينها عيان



والله العظيم وباله الرحيم يابومحمد مدري من اين ابدا ولى ويش اقول

هل اثني عليك فأنت فوق الثناء وتصغر الكلمات امام شخصك الرائع

وامام قلمك الذي اجمع الجميع على حسن مايكتب لنا من علومٍ

ترفع الراس وتنومس الرجال المناعير شرواك يابومحمد.

نعم نعم الغييثات جعلهم المعزه بفعلهم الغانم وذكرهم الباين للجميع

وفعلهم يشهدله القاصي والداني وتشهدلهم روابي نجد وحدرا

من نجد وشمالها وجنوبها بالفعوال الغانمه الى ترفع الراس.

ابومحمد بيض الله وجهك وجعل من ارثك في الجنه

على هذي الروايه التي تبني في الواحد منا ماهوا الوفاء

وماهي عزت النفس التي قدمها لنا الفارس والشاعر

محمد بن عيد الغياثات عليه رحمة الله وكل مسلم

والله لو يكتب الواحد منا اسطر لن يوفيك حقك يابومحمد

اسأل الله ان يبارك في مساعيك وان يبارك في قلمك

وفكرك واحساسك وان يهنيك في عمرك ويبارك فيه.

تقبل تقديري واحترامي واعتزازي في شخصك النبيل

اخوك / فـــهـــد الـــغــــريـــري,,,,,

الواضح 22-09-2005 01:42 PM

الأخ / دغش البطي


تسلم تسلم يابو محمد




على إيراد هذه القصة والقصيدة



و فعول الغييثات تنومس



وصح لسان ابن عيد شاعر وفارس

يحيى الودعاني 22-09-2005 04:30 PM

تسلم أخوي دغش على هسوالف الطيبة
دايم اعلومك طيبة ولها نكهه خاصه

ابو زيد الغييثي 22-09-2005 08:59 PM

الاستاذ


دغش البطي

(قرم الشياحين )


انا اشهد ان علمك غانم



تقبل تحياتي ابو زيد

دغش البطي 24-09-2005 09:00 PM

اقتباس:

المشاركة الأصلية كتبت بواسطة مترك المسعري
لا هنت أخوي دغش البطي على القصة الرائعة



و الله و النعم بالغييثات و العجمان



و لا تبطي بجديدك يالغالي ,,,,,,,,


مترك المسعري

من قال ماهان ياذيبان

ولاعليكم زود يابني عمي وافينٍ جعلكم المعزه

والفعل الطيب للقبيلة كافه

تحياتي لك

محب الجميع : دغش البطي

دغش البطي 24-09-2005 09:03 PM

اقتباس:

المشاركة الأصلية كتبت بواسطة عبدالله الصخيبري
ابو محمد بيض الله وجهك على القصه وعوايدكم الناموس ياموسعة الحدود


الأخ العزيز الغالي عبدالله الصخيبري

وجهك أبيض ياأبن عمي

ولاهنت على المرور العاطر والتعقيب الفاخر

لاشلت يمناك ياكحيلان

وأنتو ماعليكم زود وافين جعلكم المعزه

عاطر التحايا القلبية لك

من محب الجميع

دغش البطي 24-09-2005 09:06 PM

محب الجميع ومحبوبهم ( دغش بن بطي )
العلوم الطيبه عندك تزين وتبان
هذي عوايدك وعوايدهم شجعان وقروم
والعلوم الوافيه عندك وعندهم
كفو والله كفو
بارك الله فيك
وعساك على القوه دايم الدوم
اخوك
ابو عبد الله الشكري
[/QUOTE

المراقب الفاضل الشكري

يامرحبا والله ومسهلا ياابو عبدالله

تزين السوالف والكتابات بمرورك العاطر وبتعقيبك الفاخر

لاشلت يمناك ياذيبان

وأنتو ماعليكم زود وافين جعلكم المعزه

لاهنت لاهنت لاهنت وبيض الله وجهك

تقبل الود والتقدير والشكر والعرفان

من محب الجميع

دغش البطي 24-09-2005 09:11 PM

اقتباس:

المشاركة الأصلية كتبت بواسطة العرابي
الأخ الشاعر والراوية .. دغش البطي ..


جعل يمينك ما يجيها العطب ياكحيلان ...

على ذا الرواية اللي خطيتها ..

واللي يتنومس بها .. بفعل ابطالها الغييثات ..

والأبيات الشعريه اللي قالها ابن عيد ..

لقد كان الوفاء متأصل في نفوس الأوليين ...

مع ماكانو يكابدونه ويعيشون فيه ..

من ضنق العيش ومصاعب الحياة ..


ورحم الله الشاعر القائل ...

يحول يسلم القديميين ما اصعبك = من لا عرفهم شك في وزن جيلي

تقبل كل الود والتقدير

أخوك في الله

العرابي


الكاتب المميز : العرابي

بمرورك الفاخر وبتعقيبك الرائع إزدانت الصفحة وتلألأت بالنور

الحقيقه ردك العاطر قزَم قلمي وألجمه ولم تجعل لي من الكلمات العذبه

ماأكتبه لك ياذيبان

سلمت يمينك وطالت حياتك على العز والطاعه

وأشكرك جزيل الشكر على الرد الجميل والثناء الأجمل

ولاعليكم زود وافين جعلكم المعزه

عاطر التحايا القلبية لك

من محب الجميع

دغش البطي 24-09-2005 09:14 PM

اقتباس:

المشاركة الأصلية كتبت بواسطة السفيــر

وعليكم السلام ورحمة الله وبركاته

الأخ الغالي السفير

أررررررحب أرررررررررحب ياذيبان

الحقيقه أسعدني مرورك العاطر وتعقيبك الفاخر

لاشلت يمناك وبيض الله وجهك على ماأبديت من مشاعرٍ تجاهي

تقبل الود والتقدير والشكر والعرفان

من محب الجميع


الساعة الآن 02:13 PM

Powered by vBulletin® Copyright ©2000 - 2025, Jelsoft Enterprises Ltd.
---