أبطيت ما أبديت مافي خاطـري مـن كـلام=لـو بيـن الاضـلاع هـمٍ مايعـدّه عــدد
سكّـت لأن الكـلام يهـجّ بــاب الـمـلام=واليوم طالت بـي اوجاعـي وطـال الأمـد
اليا انجلا الليـل الاظلـم حـل بعـده ظـلام=كـن الظـلام متسـيّـد عالـمـي لـلأبـد
ورحى المواجع ليـا دقـت جـروحٍ قـدام=قامـت سنينـي تناولهـا جــروحٍ جــدد
واليا تقضّبت فـي حبـل الرجـا مااستقـام=امّا فلت مـن يـدي والا غـدا مـن مسـد
صحيت مـن صدمـةٍ منهـا يفيـق النيـام=في غفلتي مادريت الاّ بـ.. (( قم ياولـد ))
ووقفت والمـوت مابيـن اللحـم والعظـام=يفتك وانـا اطلـب مـدد لكـن مابـه مـدد
ناديت من حولي وصوتـي صـدح فالزحـام=وصـداه عـوّد علـي يقـول مافيـه احـد
ربعي مضوا دون عوده .. لو حشمت الحشام=واصحابي اقفوا بعد .. واحبابي اقفوا بعـد
والغيث عيّـا يحـول مـن بطـون الغمـام=لو .. لوّح البرق فـي وجهـه ودنّ الرعـد
أمشي واشوف التساؤل فـي عيـون الأنـام=ليه الزمـان انقلـب والكـون جـنّ وقعـد
ليه انقتل حلم مـن يحلـم بعيـش السـلام=اليا سلم من حميّـد .. ماسلـم مـن حمـد
بين المحـن والـزلازل والحمـم والحطـام=ذنوب تفعل عمـد .. وذنـوب شبـه العَمَـد
وطى الكبير الصغير وقيـل حسـب النظـام=ووطت بلد في بلد .. قالـوا سياسـة بلـد
وانا أرى والله اعلـم .. والنـوازل جسـام=نص البلاوي بدت من تحـت راس الحسـد
كلن يبا الـزود عنـده لـو يجـي بالحـرام=ياخـذ ويمنـاه .. مغلولـه ليـا جـا يمـد
اضعاف الانفس هل الروغات روس اللئـام=تناقـص ايامهـم واحوالهـم فــي نـكـد
لا شافوا ابن الكرام اللـي بلـغ لـه مـرام=كلن جذب مـن قصـي الـروح ونّـة كمـد
أبديت بعض الكلام وفيـه عنـدي كـلام=عساااي ما انحّد في عمري واقولـه لأحـد