اما لطمنا العيل والا الطم العيل=مادام شب النار مندوب الاطفا
من ذاق حر القايله يعشق الليل=ومن شب ضوه ليلة البرد يدفـا
امسيت في جيلٍ ولاهوب ذالجيل=واصبحت والا ديرتي شبه منفـا
واللي حما بيته بطيـرن ابابيـل=ماجيت ادور كل من صد وقفا
ولاجيت ابشحذ يانما دلّه وهيل=جيتك وجرح الظلم غاديه يشفا
جيتك بكلمه كنها صعقة الويل=ان قلت تكفا لاتهـاون بتكفـا
تكفى تراها كلمةٍ تقطم الحيـل=لابالله الا تنسف الحيـل نسفـا
تكفى ترا تكفا لها هدرة السيـل=في صدر حرٍ ينتف الطيب نتفـا
تكفى ترا تكفا لها تسّرج الخيـل=ان كان لك في مجمع الخيل عسفا
تكفى تراني من قرومٍ مشاكيـل=حماية الساقه بسيـفٍ وشلفـا
تكفى وتكفا ماتسـاق لمهابيـل=تكفا تخلّي القرم لاشٍ وهطفـا
تكفى ترى تكفا تهزّ الرجاجيـل=لولا ظروف الوقت ماقلت تكفا