قال منهو يبدع القاف في حبكه شطير=يستقيم اليا استقاده ويرفع غايته
قال قدني دام قولك لربعك بالعبير=قلت سمّ وقال تسلم وجاب املايته
طاب لي بدع القوافي وزانت بالمسير=بالوفا جتني على الطيب ترفع رايته
وجيت اسجلها بعد قاد لي سلك الحرير=في مقام اللي ولاهم دخلت ولايته
ربعي اللي في سما العزّ تجبر بالكسير=وفي نحا العايل سيوفٍ تجيب نهايته
من على مر الليالي وزوغات النظير=والدواسر للمعادي دواه ودايته
كم خذو ذودٍ من القوم غصبٍ والنذير=فزعته ماعاونت له وجات عمايته
وجات كسبٍ من على الجدّ وامست ماتذير=واحتموها من خذوها وراحت فايته
في زمانٍ والمغازي تدور وتستدير=والتفق تشعق بروقه معا رمايته
من على وقت الجهل والمكارم تستنير=والمعادي ينقل الكيل من كوّايته
ويوم حربٍ فالوديعه وصفقٍ بالعسير=والدواسر هم قناده وهم عدّايته
ويوم جالت صوب جيزان فتح وجمع خير=والدواسر هم حزامه وهم ظوّايته
ويوم صالت فالبريمي على الحدّ الخطير=والدواسر تنقل الحمل هم فدّايته
ماتوانو بالمغازي ونارٍ بالسعير=والمعادي من صلفهم تزود اقفايته
وكم خذو دارٍ من القوم في جوٍّ غبير=بين زرق الرمح الاشهب وزند ارهايته
لاعوى ذيب من البعد جاوب له برير=والفزايع تنتحي له لصوت عوايته
يدبسون القوم عمدن بسيفٍ مايحير=من شظاه العظم الآسط تجذّ هوايته
كم عقيدٍ من صلفهم يحوذ ويستجير=موصيٍ ربعه على البعد ساق وصايته
قال خلّو ديره العوق وارضو باليسير=من نصاهم ماتوفق وذاق كفايته
يوم قبله كم عقيد غذابه كلّ طير=جا مبيعٍ بالهقاوي وهم شرايته
سجلو مجدٍ كبيرٍ تناقله الصغير=وارتقو في رايه العزّ بين روايته
نوم عيني ياربوعي ويالفعل الكبير=مجدكم عزٍّ رموزه تطول بنايته

المشاركة الأصلية كتبت بواسطة الـمـحـامـي (المشاركة 533545) ارحب ياشمس الحقيقه ومرحبا بالقصيد الجزل لي الشرف اني ارد اول واحد على هذه القصيده اللي ترفع الراس بيض الله وجهك بيض الله وجهك وصح الله السانك وجمل الله حالك ,نومستنا يانوماس على ذكر بعض فعول ربعنا الله لا يهينك على كل حال

المشاركة الأصلية كتبت بواسطة خميس مطر الغييثي (المشاركة 533571) صح لسانك واعتلى شانك يالقرم بيض الله وجهك على هذه الرائعه والمعلقه اللتي قلت امثالها تقبل فائق الاحترام والتقدير لك ولما كتبت