من حسرة القلب أداعب مفردات القصيد=وارقى بها للمواجع وانثر اشواقها
بين العنا والشقى جمر القوافي وقيد=لا لامستها حروفي تنزف اعماقها
ونا في بنك المواجع لي حساب ورصيد= اقنى دموع المحاجر واعشق احداقها
يا فرح الأيام ليه دروبنا لك بعيد= ليه الرجل لا مشت لك يلتوي ساقها
قلته ونا اللي على عرش الحزن صرت سيد= من كثر زيف السنين ولعبة اوراقها
حطيتني يازمن في معصم الجرح قيد = خليتني بين صادقها وبواقها
اطرد سراب الموادع بين صحراء وبيد= لين الفضاء بالمشاعر ضاق بآفاقها
اشعلت ليل الفراق وذاب منه الجليد= ما يعرف الحسره الا قلب من ذاقها
حسرة محبٍ سكني بين نبض ووريد = ونا سكنته غلا من طيبة اخلاقها
من شانها اكتب واغني للمحبه نشيد= من شانها العين ما نامت من افراقها
ودعتك الله يا قلبٍ في زمانه فريد= واهديتك جروح قلبي لاجل تشتاقها
عساك تذكر غلايه لا لفى كل عيد = لا وقفت كل عذرا دون عشّاقها